Programín de la IX Primer Sidre L’Añu

La Primer Sidre L’Añu ye la espicha más importante qu’esiste, tantu por asistencia, como por númberu de llagares participantes, y con ella nagúrase la temporada sidrera asturiana

Esta cellebración, declarada de raigañu social pol Conceyu de Xixón, da bona amuesa de lo viva que ta la cultura sidrera nel nuesu país y de lo importante que ye para los asturianos.

Tendrá lugar del 29 de marzu al 1 d’abril nel Muséu del Pueblu d’Asturies, Xixón y va ufiertar la posibilidá a los asistentes d’esfrutar de la sidre de más de 70 llagares, por namás 6 €, de forma relaxada, ensin prieses, y nel idílicu escenariu qu’ufierta’l Muséu del Pueblu d’Asturies 

Con esti eventu escomenzó  a reivindicase la sidre sobro la madre, ensin trasegar, una variedá de sidre que cayere nel escaezu pol procesu d’industrialización de los llagares, y qu’anguañu yá cunta con dellos llagares que la comercialicen. Nesi sen consideramos fundamental el concursu que rializamos de la Meyor Primer Sidre L’Añu, ún de los más importantes del país, con 45 llagares participantes y qu’esti añu ganó

Sidra Riestra, que sedrá la Sidre Oficial d’esta edición de la PSLA

La PSLA cunta con una peramplia programación diario na que ye importante destacar lo siguiente:

• Presentación a cargu del míticu Tino “El Roxu”, con intervención del Conceyal de Turismu y festexos del Ayuntamientu Xixón, Jesús Martínez Salvador y una representación de les principales confraderíes asturiana que de dalguna manera apadrinen l’eventu. Tres la presentación habrá una esibición d’echáu artísticu
• Sidracrucis’18.- Vienres 30. La procesión sidrera que lleva a los amantes de la sidre de chigre en chigre y de llagar en llagar, y que va tener como exa del so percorríu la PSLA
• IX Edición Asturianada y Sidre. Que se va cellebrar vienres y sábadu, y que va cuntar cola actuación de nuevos intérpretes de tonada de les Escueles de Música Tradicional de La Quintana, Manolo Quirós y Colunga.

VII Concursu de Sidre Casero fecho en madera. Únicu na so especialidá y col que pretendese dar puxu al usu tradicional de los toneles de maera na ellaboración de sidra, que per otra parte esti añu va cuntar con importantes premios, el principal d’ellos una pipa de sidre pal ganador.

Como ye de xacíu, los neños van ser protagonistes principales nel eventu y cuntamos con una amplia programación infantil en base a esportes tradicionales na que nun va faltar la mayada de sidre nin el concursu infantil d’echadores.

Per otra parte, si hai daqué que siempres tuvo presente dende l’entamu de la cellebración de la PSLA foi la necesidá d’anovase y anovar de forma siguida, de tala miente que l’eventu reinvéntese ca añu con nueves aportaciones.

L’añu pasáu incorporóse como novedá l’espaciu pa mascotes, y la sidre dulce y ensin alcol, y l’acesu gratuitu pa quien alleguen en bicicleta la xornada del domingu 1 d’abril, en collaboración cola asociación Xixón en bici y la so campaña “30 díis en bici”. Esti añu vase muncho más allá, ameyorando les iniciatives pasaes y plantegándomos otres nueves como:

• Información multilingüe. Ca añu ye mayor el númberu de visitantes estranxeros, tantu presones individuales como medios de comunicación; ello asina, vamos cuntar con un equipu d’atención qu’amás del asturianu y l’español va poder informar n’inglés, francés, italianu y alemán.
• Menú vexetarianu. La nuesa magnífica parrilla va cuntar esti añu per primer vegada con un menú vexetarianu, dando respuesta asina a una demanda ca vegada más xeneralizada ente los asistentes al nuesu eventu.
• Carpa infantil. Les actividaes pa los más piqueños son parte prioritario de la PSLA, y anque munches de les actividaes planiaes tienen llugar al campu, esti añu vamos disponer d’un espaciu abellugáu pa ellos.
• Tasties, degustaciones y harmonizaciones. Nesta novena edición vamos cuntar con una programación diario y continuo d’esta triba d’esperiencia que permite a los asistentes conocer y esfrutar de la sidre nes sos estremaes formes y variedaes.
• Espaciu Cardioprotexíu. Esti añu vamos disponer del equipamientu necesariu (desfibrilador), y el presonal mélicu cola formación preciso, p’atender de manera eficaz una parada cardiaca fasta la llegada de los servicios mélicos d’emerxencia. Con esta midía adelantramosmos a les dimposiciones esistentes pa esta triba d’eventos a nivel européu, y apurrimos una seguridá a tolos nuesos visitantes.
• ¡Bebi con xacíu!. Anque la llexislación española entá nun lo esixa, asumimos los principios europeos nos que l’anunciu d’actividaes rellacionaes con bébores alcóliques lleven un llamamientu al so consumu responsable y moderao, de tala miente que l’eslogan “Bebi con xacíu. Ye la nuesa cultura. Ye la to responsabilidá” va tar presente en tol eventu, recordando de camín que la cultura asturiana de la sidre nun ye xuna cultura de “enfile”, sinón de rellaciones sociales.

Asina mesmo, hai de destacar qu’esti añu apurriráse a ca asistente a la PSLA un Mapa de chigres de Xixón, onde vienen indicaes les sidreríes de la ciudá.

L’oxetivu de la PSLA ye esparder y dar puxu a la cultura sidrera asturiana, y parte fundamental d’ella son los chigres, por eso esti mapa ye una ferramienta indispensable pa que, tres el pasu pela PSLA, pueda siguise conociendo y esfrutando de la cultura sidrera asturiana nos chigres xixoneses