Un añu más, la feria holandesa de la sidre fai por axuntar lo meyor d’Europa.
Esti dos de xunu, comu ca añu, tien llugar en Rotterdam, Holanda, el Festival Internacional de la Sidra, una cellebración de la diversidá sidrera n’Europa y un perbonu escaparate pa dar a conocer los llagares más internacionales y más al díí del panorama sidreru d’anguañu.
El festival va tener llugar na Fenix Food Factory, asitiada n’una atmósfera bien relaxada, un pocu industrial, onde los panaeros, los espertos en quesu y cerveceros, trabayen y onde cientos d’amantes de la gastronomía faen les sos merques davezu, especialmente un sábadu. Ellí ca productor va tener el so estand y va convidáse-yos dempués a asistir a una cena con maridaxe de sidre al empar de tolos participantes.
Los muerganizaores, Raúl y Wouter, tuvieren trabayando asgaya dende la cabera edición pa faer d’ésta una percompleta representación de les sidres europees, tantu en númberu participantes comu na calidá de les sidres que van poder tastiase. Ente elles caben destacar llagares comu Abavas, de Letonia, visitantes davezu a les feries internacionales n’Europa, asimesmu La Galotière, de Normandía, que de xuru nun va dexar a naide indiferente. El representante d’Irlanda va ser de xacíu Finnbarra, vamos cuntar tamién con Hoxton Cidersmiths de Londres y d’Holanda en representación del país anfitrión, De Vergeten Appel (La Mazana Escaecía), ¡de quien nun mos escaecemos!
De les sidres asturianes presentes, cabe destacar les del llagar Viuda de Angelón, que va ufiertar la so Brut, Brut Nature Prau Monga, 1947, sidra de pera y comu non, la so sidra tradicional y más representativa de la sidre tradicional asturiana.
Como nun podía ser d’otramiente, una delegación de LA SIDRA va allegase al eventu comu n’ediciones anteriores en representación de la cultura sidrera asturiana y del Salón Internacional de les Sidres de Gala (SISGA). Amás d’eso, comu embaxaores de la cultura sidrera internacional vamos ser los encargaos d’inaugurar l’eventu y d’anunciar a los ganaores del concursu Oogappeltje (La mazana los mios güeyos), un honor qu’estimamos por adelantao. Esti galardón cunta con dos categoríes destremaes: un Favoritu del Festival (otorgáu pola muerganización) y un Favoritu del Públicu (por votación popular).
¡Vémonos ellí! Zie je daar!
