L’apretáu programa d’actividaes del SISGA permitió nun solu díi conocer a fondu la sidre de tres países, visitar un llagar, deprender a echar la sidre y averase a la gastronomía asturiana
Nel discursu col que dio aniciu oficialmente al XII Salón Internacional de les Sidres de Gala, Marcos Abel Fernández, presidente de la Fundación Asturies XXI, punxo n’antecedentes a los llagareros veníos de dellos continentes “Somos un país pequeñu onde’l consumu mediu de sidre ye de 45 litros por persona y añu, nel casu de Xixón, 65 llitros por persona y añu, a años lluz de cualquier casu conocíu. Pa los que vengais cola referencia d’España, decivos que vais topavos con otra realidad, equí nun se tortura a los toros, equí nun vais topar faralaes, nin olivillas, nin gazpacho, esto ye otra cultura, otra forma de ser y ya nos diréis conociendo.” A lo llargo’l díi pudieron dir atalantando a qué se refería, nun intensu primer contautu cola Cultura Sidrera Asturiana.
Na naguración participaron tamién Manuel Busto, presidente del xuráu del SISGA, Pedro Duque, chef del Restaurante El Duque, onde se cellebrará’l brunch de gala el domingu y tres embaxadores de les Sidres de Gala pel mundiu, Yana Prochazkova de Chequia, Dominic Lagadec del País Vascu Francés y Christian Stolte, escocés, que darréu presentó les sos sidres nun primer brindis nagural, sosprendiendo a tolos presentes coles sos elegantes propuestes, incluyendo una peculiar sidre con ocle, perfecha p’acompangar platos marinos.
Una bones oficialmente entamáu’l Salón, los participantes tuvieron esi primer contautu cola Cultura Sidrera Asturiana, nesti casu por vía gastronómica, con una xinta na Sidrería Casa Nabel, onde esfrutaron d’una bona fabada, con merluza na so salsa de segundu y tarta de yema de postre, tou ello acompangao d’abondosa Sidre Trabanco.
Asina recargaos desplazáronse a les istalaciones de la Escuela d’Hostelería y Turismu de Xixón -entidá collaboraora del SISGA-, onde Dace Plūmes, llagareru letón, presentó los sos productos nuna interesante tastia guiada que permitió a los asistentes percibir tolos matices d’una sidre bien estremada a la de nueso.
Darréu foi el turnu de la sidre asturiana, cola presentación de la man de Raúl Riestra de los productos del Llagar Sidra Riestra, siendo quiciás el más destacable pal consumidor asturianu la so sidre de llata, Germán, un formatu modernu y cómodu que permite llevar la sidre a cualisquier lláu calteniendo les carauterístiques d’una sidre mui nuesa.
La tarde continuó con una visita al Llagar J.R., onde amás de conocer les istalaciones ya’l procesu d’ellaboración de la sidre asturiana, la delegación internacional recibió una prestosa masterclass d’echar sidre de la man de Loreto García -Sidrería El Madreñeru-.
Nesta xornada consiguióse ampliamente los dos porgüeyos del SISGA, conocer les sidres que se faen en llugares llonxanos y amosar la Cultura Sidrera al restu’l mundiu.
La de güei va ser una xornada comu mínimu igual d’intensa, entamando dende bien ceo col aconceyamientu del Xuráu Internacional que decidirá los naguaos Premios SISGA’22.
Apurrímosvos el programa del díi, encamentandovos a consultar el programa completu del Salón Internacional de les Sidres de Gala na nuesa páxina web.
VIENRES 30 Setiembre
MAÑANA. Restaurante El Duque
9:30 a 14:00 h. Costitución del Xuráu Internacional de los
Premios SISGA’22
Alternativo:
- Muséu Pueblu d’Asturies
- Botánicu
- Pumarada DOP Sidre d’Asturies
TARDE. CIFP Hostelería y Turismu de Xixón
16:30 a 17:15 h.
- Juan Zuriarrain. Presentación del proyeutu “Sagezti Ardua” –sidre y miel-
- Showcooking con sidre y mazana a cargu d’Estefanía Ferreras, Chef de Miscelanea Gastro
17:15 a 17:45 h. Degustación de cocina de sidre y mazana
17:45 a 20:00 h.
- Tasties guiaes
- 17:45 a 18:10 h. Sidra de Xelu Cortina, a cargu del llagarero Tino Cortina, de Sidra Cortina. Asturies
- 18:10 a 18:35 h. Abuls Cider, a cargu de Janis Matvegs. Letonia
- 18:35 a 19:00 h. Sidra Fran, a cargu d’Arcadio Vázquez. Asturies
- 19:00 a 19:25 h. Cider Sekt, a cargu de Jiří Procházka. República Checa
- 19:25 a 20:00 h. Taller d’importación / edportación a cargu de Joaquín Menéndez, de LA LUNA SHIPPING. Asturies
- Taller práuticu de coctelería de la sidre a cargu de Benedicta Zurro, profesora del CIFP Hostelería y Turismo de Xixón
20:00 a 20:30 h. Degustación de cócteles
20:45 h. Espicha Xermandía
