La sidre d’Italia, Madeira y Asturies protagonizaron la xornada d’apertura del XIII Salón Internacional de les Sidres de Gala.
Na xornada de güei va axuntase el xuráu internacional que va otorgar los Premios SISGA, va roblase’l protocolu de la Rede de Ciudaes Europees de la Sidra y va visitase Nava, onde Tatsuro Fuji de Fukiware Cidrerie –Tokio- va presentar los sos productos
LA SIDRA.- Ayeri celebróse la ceremonia d’inaguración del XIII SISGA, qu’abrió la vez d’intervenciones con Marcos A. Fdz. Presidente de la Fundación Asturies XXI, organizadora del eventu XIII SISGA, quien dedicó les sos primeres pallabres a estimar la presencia tanto de los voluntarios que faen posible la cellebración d’esti eventu como de los munchos ellaboradores veníos dende los cuatro puntos del globu a visitar Asturies estos díes.
En definiendo’l SISGA como “Un eventu un pocu especial, nel que se prima la confraternización, l’intercambiu de conocencies, la interrellación comercial y col que pretendemos que los participantes compartan esperiencies venceyaes al mundu de la sidra que-yos permitan ameyorar profesionalmente y tresmitir les posibilidaes qu’esisten alredor de la sidra, estableciendo relaciones personales y comerciales que faciliten el desenvolvimientu de la so actividá profesional”, destacó la fuerte participación de los lletones y felicitó a el productores de Madeira, qu’apocayá llograron pa la so sidra la reconocencia IGP.
La Rede Europea de Ciudaes de la Sidra, que’l so protocolu va ser robláu na tarde de güei per parte d’autoridaes de dellos países, va ser el puntu central d’esta edición del Salón; en palabres de Marcos A. “La sidra ye una especie de pegamin, daqué que xune persones, pueblos, cultures… pero tamién empreses, intereses, proyectos, una forma de xunión ente toos estos aspeutos que tien que tar espresáu de dalguna manera, nun puede quedase en poesía. Por eso celebramos esti Salón y por eso tamién vamos roblar mañana la constitución de la Rede de les Ciudaes Europees de la Sidra”.
De siguío tomó la palabra Manuel G. Busto, Presidente delXuráu de los Premios SISGA, quien tien per delantre’l difícil llabor d’entamar el procesu de valoración de los 287 productos presentaos, harmonizando los distintos gustos y sensibilidaes presentes ente los xuraos, procedentes de tolos llagares participantes. “Delles persones dicen que somos bien estrictos na valoración de les sidres que se presenten a los Premios SISGA. Ye ciertu. Equí nin se merquen nin se vienden premios, equí otórguense premios pola calidá de los productos, teneis que ganavoslos”
Amás de recordar el funcionamientu del concursu, Busto repasó’l procesu de llegalización de la nomenclatura sidrera n’Asturies, nel qu’agora se basa la organización de les categoríes de los Premios SISGA.
Gianluca Telloli enólogu del Llagar Maley -Val d’ Aosta, Italia- intervieno de siguío, reclamando pa la sidre la mesma dignidá y reconocencia que pa un gran vinu. “Si queremos que la xente siga cultivando mazanes tenemos de garantizar el rendimientu económicu de la sidre, si queremos que les nueses sidreríes sigan viviendo, tenemos que garantizar la so viabilidá comercial”, incidiendo na necesidá de tener amplitú de mires y ser optimistes respectu al futuru de la sidre “Cuanto más alto xúbese, más llueñe llega la vista”.
Esi nivel que reclama pa la sidre en xeneral espéyase na calidá de los sos productos, que presentó de siguío y que prestaron sobremanera al desixente públicu, formáu polos llagareros y espertos veníos al SISGA.
Les tasties que se celebraron a lo llargo de la tarde permitieron non solo conocer los productos de Madeira, sinón tomar contactu coles peculiaridaes d’esa sidra y esa Islla, que la so orografía inflúi de manera importante sobre los sos productos, siendo asina que sidres ellaboraes en puntos distantes de la islla, coles mesmes variedaes de mazana y el mesmu procedimientu, presenten característiques bien estremaes. Ye bien destacable el fuerte compromisu ya implicación de les autoridaes y gobiernu de Madeira que ta facilitando’l desendolcu del sector y la so reconocencia.
Finalmente, Celestino Vázquez, de sidra Panizales, realizó un percorríu por dalgunos de los sos meyores productos. Esti alquimista mierense de la sidra cautivó nuevamente a toos tantu cola escelente calidá de les sos ellaboraciones como poles sos conocencies y visión de la sidra, que lu lleva a esperimentar consiguiendo productos tan sorprendentes como la so sidra natural tranquila Ati, la sidra de xelu y la de fueu y Viesk, una bébora qu’entra dientro del ámbitu de los vermouts, ensin selo esactamente.
Recordamos que la xornada de güei va ser importante ya intensa, yá que a lo llargo del día axuntaráse’l xuráu internacional que va otorgar los Premios SISGA, va roblase’l protocolu de la Rede de Ciudaes Europees de la Sidra y va visitase Nava, onde Tatsuro Fuji de Fukiware Cidrerie –Tokio- va presentar los sos productos, anantes de dar a los participantes internacionales la oportunidá de conocer un de los actos asturianos más conocios, una espicha.
