La sidre asturiano tuvo un destacáu papel nel eventu danés, cola sidre DOP y Roxmut.
LA SIDRA.- De notable ésitu pue calificase la edición del Rigtig Cider que vien de cellebrase esta fin de selmana en Copenhague, Dinamarca, tantu pol númberu de llagares participantes comu pola calidá de la sidre presentao y la perimportante afluyencia d’un públicu interesáu qu’en tou momentu supo apreciar les virtúes de la sidre nes estremaes presentaciones qu’ellí s’ufrieron.
No que cinca a la presencia asturiana, LA SIDRA cuntó col so propiu estand dende’l que se dio a conocer la nuesa sidre, concretamente aquello que cunta con DOP, representao poles sidres distinguíes esti añu nel Salón de la Sidre DOP: Val de Boides, Españar y EM. Arriendes d’ello, tamién presentose Roxmut, el yá míticu vermut de sidre del llagar Castañón, que sosprendió tantu como gustó a los asistentes, nun topándose en tola ufierta de sidre esistente dengún productu asemeyáu.
Por supuestu, l’echáu de la sidre sigue siendo puntu d’atención pa tol mundiu, anque ye verdá que ca vegada ye más conocío, por mor del importante llabor internacional que fain dellos llagareros asturianos, la ca vegada mayor asistencia de visitantes estranxeros a los eventos sidreros asturianos (PSLA; Xixón de Sidre, Festival de Nava, SISGA…) y el llabor desendolcáu dende LA SIDRA-Fundación Asturies XXI, que namás nesti añu tuvo presente en media docena d’eventos sidreros internacionales, llevando la sidre, y la cultura asturiana de la sidre ellí per ú va.
Por supuestu, nel stand de LA SIDRA cuntábase con amplia información sobro’l nuesu país, tantu de conteníu cultural comu turísticu, especialmente del Ayuntamientu Xixón, con quien la Fundación Asturies XXI caltién un conveniu de collaboración pa la rialización del Salón Internacional de les Sidres de Gala, cuya sesta edición tendrá llugar del 30 setiembre al 2 d’ochobre.prósimos.
