LA SIDRA convoca la tercer edición del Concursu a la Meyor Primer Sidre l’Añu, el segundu concursos sidreru del país por númberu participantes. El concursu tendrá llugar na xixonesa Sidrería El Otru Mallu, el 10 y 11 d’esti mes.
LA SIDRA.- Per tercer añu consecutivu, la VII PSLA cuntará con una sidre oficial, aquella que resulte ganaora del premiu a la Meyor Primer Sidre l’Añu, únicu esistente que tien comu protagonista a la sidre nuevo, ensin trasegar, y que nestos intres yá ye’l tercer concursu de sidre del país por númberu de participantes nel mesmu.
El concursu tendrá llugar na Sidrería El Otru Mallu, el xuráu tará presidíu por Manuel Busto, y conformaránlu tamién Joaquín Fernández, Guti de La Ballera, Ricardo Ríos y Mercedes de Sid. La Mareona, cuntando pal serviciu del xuráu colos meyores echaores d’Asturies, el campión del 2015 Jorge Varas, y los campiones de pasaes ediciones Wilkin Aquiles y Salvador Ondó.
L’asistencia a les delliberaciones sedrá abierta al públicu. El vienres 11, entamará el concursu de magar les 5 la tardi y nelli escoyeránse 5 finalistes que pasarán a la final el sábadu 12, a la mesma hora. Na final les puntuaciones sedrán públiques pa los asistentes, pero non pal xuráu, de tala miente que podrán dir conociéndose los resultaos pasu ente pasu. A la fin del concursu daráse la preba de les sidres clasificaes a los asistentes que lo deseyen.
