Con 44 llagares inscritos, conviértese nel segundu n’importancia de Asturies en cuantu a númberu participantes.
La sidre ganaor sedrá la Sidre Oficial de la PSLA
El Concursu a la Meyor Primer Sidre l’Añu, únicu en Asturies que tien comu protagonista a la sidre nuevo, ensin trasegar, va realizase los díis 20 y 21 na Sidrería Zapico de Xixón.
LA SIDRA.- Pesia qu’esti añu los llagares avisen que la sidre vien un pocu atrasao por xides climatolóxiques, y entá nun ta nel so meyor momentu, lo cierto ye qu’agora mesmo yá son 44 los llagares que s’animaron a participar nesti concursu a la “Meyor Primer Sidre l’Añu”, ello ye, a la sidre recién fecho y que nun foi trasegada. Tou un ésitu teniendo en cuenta la orixinalidá d’esti concursu, y qu’asitien a esti concursu en segundu llugar tocantenes a participación de tolos que se cellebren nel nuesu país.
Y ye que la rempuesta de los llagares a esta convocatoria ta siendo más que bona, aidando a recuperar la tradicional sidre recien fecha, que fasta apocayá yera la qu’escomenzaba a espichase precisamente na Selmana Santa, y que cola modernización de los llagares y la xeneralización del trasiegu llegó práuticamente a esaniciase, calteniéndose namá nos llagares caseros.
El concursu va rializase na Sidrería Zapico, de Xixón, los díis 20 y 21 de marzu, de magar les 17:30, y va tar abiertu a l’asistencia de públicu, cuntando con un xuráu de reconocíu prestixu. El vienres 20 va rializase la preseleición na que se van escoyer les cinco meyores que’l sábadu 21 van ser prebaes en tastia ciega pol xuráu con puntuación pública y en direutu, de tala forma que va dise conociendo la puntuación llograda por caúna de les 5 sidres finalistes.
Lo mesmol que l’añu pasáu, y pa favorecer un procesu más xustu, en ca tanda elliminaráse la mayor y la menor puntuación, pa evitar cualquier esviación sobro la nota.
Al rematar el concursu, y yá conocía la sidre ganador, el públicu asistente va poder prebar les sidres presentaes al concursu, pa que pueda conocer de primer man les sidres presentaes y valorales.
La sidre ganaor sedrá la Sidre Oficial de la PSLA y mercaráse-y un mínimu de 100 caxes.
