El sellu de sidre Mazana Seleicionao curia mui muncho la sidre que pue llevar esta marca na so escontraetiqueta. Por eso, el pasáu llunes 18 d’abril cellebróse na sidrería El Forno, en La Pola Sieru, la postrer preba a la que tienen de sometese los llagares aspirantes: una tastia rializada por espertos sidreros que van calificar la sidre.
LA SIDRA.- Los llagares que se someten a esta valoración , Trabanco, Peñón, Foncueva y Muñiz, formen parte d’esta marca que pretende da-y puxu a la mazana asturiano y la sidre de calidá. Al actu cellebráu na capital sierense asistieron espertos nel mundiu la sidre, medios de comunicación y curiosos o aficionaos que tampoco nun lo queríen perder. El comité de tastia, encargáu de prebar y calificar la sidre, tuvo presidíu por Maximino Villarrica, y demientres la cellebración del eventu, comu profesionales que son, tuvieron concentraos na so xera, goliendo, reparando y saborguiando ca culete. Tratase de sidre “sobro la madre”, ensin trasegar, puramente la primer sidre del añu.
Tocántenes a les carauterístiques que tien de tener la sidre pa que seya catalogada comu sidre de Mazana Seleicionao destaquen dellos aspeutos comu l’espalme, l’aguante, el collor y de xacíu el saborgu. Si por casu la sidre nun espalmare bien, si la espluma nun sumiera dafechu, nun se superaría la calificación. El collor tien de ser tirando a paya anque terminando con matices verdosos y el saborgu, per otra parte, ten de ser frescu, permediáu ente ácidos y amargos y con notes de secañu nel cielu la boca.
Finalmente, la resultancia de la tastia foi: sobro ventiseyes toneles probaos, quince d’ellos pasaron el corte final y van poder comercializase col sellu de sidre de Mazana Seleicionao. Namás les sidres que superen el notable van poder comercializase con esta escontraetiqueta.
La presentación d’esta collecha cellebraráse’l díi 10 de mayu a les 12 del mediudía nel Tendayu del Muséu del Pueblu d’Asturies, y va cerrase l’actu con una gran espicha pa tolos asistentes. De magar d’esi díi, yá va poder comercializase tantu n’Asturies comu a nivel estatal.
