LA SIDRA y el Cientru Asturianu de Barcelona entamen la I Folixa de la Sidre / Festa de la Sidra que se cellebrará el prósimu sábadu 30 d’abril.
LA SIDRA.- Les istalaciones del Cientru Asturianu de Barcelona (CAB), Carrer del Naranjo de Bulnes 1-7, sedrá l’escenariu onde se cellebre la I Folixa de la Sidre el prósimu sábadu 30 d’abril de 12 a 17 hores. Con ella, preténdese da-y puxu a la presencia de la nuesa bébora patria en Barcelona y en Cataluña, onde agora mesmo nun tien la repercusión que merez.
Entamada por LA SIDRA-Fundación Asturies XXI en collaboración col CAB, por 6 € esta folixa permitirá a los asistentes prebar tola sidre que quieran, d’unos 10 llagares, al empar qu’esfruten de la música asturiana a cargu de la Banda Gaites de Barcelona. Arriendes d’ello habrá puestos con chorizos a la sidre y arroz con llechi a la venta, pa “forrar” comenientemente.
Los cientros asturianos siempres foron auténtiques embaxaes asturianes ellí onde tovieron presentes, y agora mesmo, anque desatendíos dafechu por un “Principado” incompetente, siguen siendo un referente asturianu ellí onde tan, puxando por caltener la identidá y la cultura asturiana.
