El primer llagar algamó’l premiu del xuráu profesional, el segundu el del públicu.
LA SIDRA.- “¡¿Pero tais ciertos?!” repetía una y otra vegada Andrés Canal al anuncia-y los sos amigos llagareros que tornara a faese por tercer vegada consecutiva col Premiu’l Públicu na Fiesta de la Sidre Natural de Xixón qu’ayeri concluyía la so XXVII edición. Con sospresa tornaba xubir los pasos del escenariu ondes se-y entregó’l so reconocimientu y condecoración. Esta postrera engalanaría lo que quedaba de la fiesta nel stand de Sidra Canal. Nesa fastera, asitiada na Plaza l’Ayuntamientu, los llagareros vitoreaben, ya inclusu, garraron en volandes pa demostrar que non solo fai bona sidre, sinon que tamién ye un bon collaciu de profesión.
Eso sobro’l Premiu del Públicu, pero igual d’emocionáu amosóse José Antonio Norniella media hora enantes cuando-y otorgaron el Premiu del Xuráu Especializáu. “Toi percontentu, claro que si, n’especial por mio pa que ye’l promotor de Sidra Huerces” dixo’l llagareru y quien tamién s’encarga de les analítiques y control de la sidre d’una bona parte de llagares asturianos. El postreru de los reconocimientos del díi recayó -esi yá se sabía- en Rosabel Berrocal, la presona que dende 1996 encárgase d’entamar la fiesta y que por mor de la so prósima xubilación, los llagareros quinxeron reconocer el so llabor. “Nun hai ná más satisfactorio que’l que les presones coles que trabayes te reconozan el llabor” aseguró la receptora del Tonel d’Oru 2018
La Fiesta de la Sidre Natural de Xixón afechóse oficialmente a les 15:00 hores. Cientos de presones atarraquitaron demientres más de tres hores tanto la Plaza’l Marqués como la del Ayuntamientu, onde s’istalaron los 24 llagares participantes. “N’especial quiero agradecer a tolos llagareros que fain posible esta gran fiesta. Tamién a les presones que s’esfuercien tanto por entamala y que salga too bien” espresó l’alcaldesa Carmen Moriyón pa esti mediu de comunicación. Agora, a esperar la otra gran cita de la sidre en Xixón: El Salón Internacional de les Sidres de Gala -SISGA- la postrer fin de selmana de setiembre.
