Vallina llevó’l Tonel d’Oru, Piñera l’Eloxu d’Oru 2015 y Canal el Premiu’l Públicu.
LA SIDRA.- La xornada d’ayeri daba acabu a la Fiesta de la Sidre de Xixón, y foi protagonizada polos llagareros. En primer llugar por Benjamín Vallina (Sidra Vallina), que recibió’l Tonel d’Oru de manes de la propia alcaldesa Carmen Moriyón, por toa una vida dedicada a la sidre.
Dempués, José Luis Vigón, de Sidra Orizón, Eloxu d’Oru 2015, echó’l primer culín nagural, seguíu de Teodoro Moris, Sidra Los Gemelos, Premiu’l Públicu de la edición anterior. De gamar esos primeros culinos entamó la preba abierta de la sidre de los llagares participante, asitiaos comu d’avezu ente la plaza’l Marqués y la plaza Mayor.
A les dos de la tardi, tres la intervención de la banda gaites Noega, procedióse a dar a conocer los llagares ganaores de la presente edición, Sidra Piñera ganó l’Eloxu d’Oru, otorgáu pol Xuráu d’Espertos, y Sidra Canal ganó’l del Xuráu Popular. Perimportantes gallardones que punxeron a estos dos llagares perriba de la ventena de participantes nel concursu, y que foi ampliamente cellebrao polos amantes de la sidre ellí aconceyaos.
Preslla la Fiesta de la Sidre dexando perbon saborgu de boca y la impresión xeneralizada de que con récor o ensin elli, esto va a más, y que l’apueste pola cultura asturiana de la sidre, perriba de lo que ye própiamente’l productu –la sidre- ta dando los meyores resultaos nuna ciudá que pue aspirar a ser l’auténtica capital mundial de la sidre, por produición, consumu –alrodiu los 65 llitros por presona y añu, lo que supón 10 vegaes más que cualisquier otra- por númberu d’eventos sidreros que se cellebren –nun hai mes que nun hebia a lo menos ún- y pola implicación y protagonismu de la sociedá xixonesa na cultura asturiana de la sidre.
