Na edición d’esti mes de la revista en papel podéis atopar un especial d’harmonizaxes coles sidres de xelu que participaron nel SISGA
LA SIDRA.- Unu de los oxetivos del Salón Internacional de les Sidres de Gala ye amosar que la sidre ye una bébora que pue tar al altor de cualisquier propuesta gastronómica. Ye por esti motivu que la revista LA SIDRA, escomenzó a espublicar una riestra artículos sobro harmonizaxes colos productos que concursaron nel pasáu certame internacional del citáu salón. Na edición d’estos meses de payares y avientu vais atopar combinaciones con sidres de xelu. Nes siguientes llínies dexámosvos dos de los ocho propuestes.
Sidre de Xelu de Viuda de Angelón con Ceviche de pulpu. Desque salieron al mercáu, los productores de sidres de xelu aseguraron que son un escelente aperitivu, como tamién lo ye’l ceviche –dacuando llamáu ceviche o seviche–. Esti platu estrella de la cocina peruana ye igualmente propiu de más países del Nuevu Continente, cuantimás de Cientruamérica. Y magar equí na península conózse-y preparáu con pexe marináuo en llima, sal y pimienta; en Llatinoamérica tamién ye común el que lleva pulpu como base.
Amás nesta receta incluyimos aguacate, un ingrediente que-y va apurrir al platu untuosidá y va rebaxar el nivel d’acidez. La so ellaboración ye bien cenciella: cocemos el pulpu –como tola vida–, estazamos dos raxos, poner nun bol y amestámos-y zusmiu de llima fasta cubrir. Salamos al gustu y esmagayamos enriba granos de pimienta al gustu. Dempués d’unes dos hores na nevera, sacamos y entemecemos con cebolla morao y cachos d’aguacate. Sirvimos en vasos de chatéu. Tip: pa tresnar la cebolla morada hai que cortalo en rodaxes, da-y un fervor pa desflemala, colar y ponela tamién a marinar, pero esta vegada con zusmiu de naranxa fasta cubrir; aparte hai qu’amestar una cuyarada de sal.
Otru aperitivu que combina perbién con esta sidre ye un finu pastrami con mostaza de miel… va-y a la perfección Lodowa Gruszka de Cydr Chyliczki.
