Ná meyor que recibir la entrada’l branu con una de les cellebraciones más emblemátiques pa los asturianos. Fasta’l 25 tendrán llugar les emblemátiques fiestes de San Xuan en Mieres del camín, una cita atarraquitada de tradiciones y actividaes culturales pa tolos públicos. Pa detallamos qué ye lo que ta faciéndose, Diana López Antuña, conceyala de Turismu, Comerciu y Festeyos rellátamos como ta desendolcándose la cellebración. Toa esta información pue consultase na revista LA SIDRA en papel en circulación.
¿Qué actividaes tienen proyeutaes pa esti añu?
Tenemos grandes orquestes como París de Noia, Aché o La última legión por poner namás unos exemplos, grandes actuaciones como’l Tributu a los 80 “La edá d’oru del Pop pañol” compuestu por grandes artistes, o’l conciertu d’Efecto Pasillo. Apostamos tamién por músicos y artistes del país. L’encargáu del cartelu y d’una esibición de grafiti ye’l reconocíu artista “El Séptimu Críu” y tendremos tamién conciertos de música na cai, o el Mercurio Son, con grupos de música llocales, amás d’actividaes dedicaes a la cultura tradicional asturiana y l’animación ples cais. Tamién damos protagonismu a la programación infantil, meyorando la esitosa folixa de la espluma con dos toboganes, ún pa los más piqueños y otru de 12 m. pa tol que s’anime, esfrutaremos del nueu Show de Susana y del cuntacuentos musical a cargu de Puppys, ente otres cites. De too y pa tolos gustos y edaes.
¿Y en cuantes a actividaes esportives?
Pues equí tamién tenemos variedá, torneos entamaos por colexos y clús, el certame del caballu de siella, troféu de natación, la ruta ecuestre “Trotando’l Caudal”, festival de baille y danza, xornada d’axedrez, la gala del esporte…
¿Qué mas-y diríe ala xente que nunca foi a Mieres a cellebrar les fiestes patronales?
Con tolo dicho pamique nun hai escusa pa nun venir a esfrutar del gran ambiente festicu de San Xuan en Mieres, tenemos actividaes pa tolos gustos, públicu infantil, xoven, mayor… enllenu oportunidaes d’esfrutar de manera gratuito d’unes magnífiques esperiencies que nun podrán rializar notru sitiu, nun alrodiu escepcional y encantaor como ye Mieres, asina que, espero que s’animen a venir y pasalo bien.
