El Festival Intercélticu de Lorient vuelve a la normalidá y recupera tolos bonos vezos, yá clásicos de la cita n’An Oriant. Esti sábadu, como manda la tradición, yera’l turnu del troféu MacCrimmon de gaita, onde los meyores gaiteros d’Asturies y Galiza pónense a prueba pa ganar el gallardón que ye, pa munchos, la marca de meyor gaiteru de les naciones celtes del sur.
En representación d’Asturies acudieron Daniel Meré Fernández, qu’abrió l’escenariu, Jaime Álvarez Fernández, Diego Lobo y Fernando Vázquez Cárcaba, veteranos del festival. En representación de Galicia, los escoyíos foron Diego Prieto, conocíu divulgador de la gaita y la llingua gallegues, Xesús Rodríguez Callejón, Manuel Seoane y Jorge Castello.
Tolos concursantes han preparar una pieza asturiana, una gallega y una bretona pa defender na capital intercéltica, aú’l xuráu, formáu por espertos d’estes trés naciones, valora la claridá d’execución, la fidelidá y el collor d’estes interpretaciones. Daniel Meré, graduáu na promoción 2022 de gaita del Conservatoriu Superior d’Uviéu y encargáu d’entamar la sesión, decidió calentar cola pieza asturiana pa, darréu, siguir col aire gallegu y terminar cola composición bretona.
El segundu de los asturianos, Jaime Álvarez Fernández, foi ganador del troféu MacCrimmon na edición de 2017, con namái 16. Nesti casu executó les pieces gallega, bretona y asturiana. Ye yá la cuarta vegada que participa nel troféu. Diego Lobo foi el tercer concursante asturianu. L’ayeranu, de la banda El Gumial, entamó pola xota floréu asturiana, de gran dificultá, siguió cola parte gallega y finó pela bretona.
Fernando Vázquez, últimu representante y recién estrenáu como luthier, tocó primero la parte asturiana compuesta por floréu, xiringüelu y xota, seguida de la bretona, y remató coles pieces gallegues. Foi finalmente’l sierense quien llevó’l primer premiu pa casa nuna edición dedicada al nuesu país. La clasificación quedó como sigue:
8º Jorge Castello
7º Diego Lobo
6º Daniel Meré
5º Xesús Rodríguez
4º Diego Prieto
3º Manuel Seoane
2º Jaime Álvarez
1º Fernando Vázquez Cárcaba.
