El Vicealcalde del Conceyu Xixón afirmó nel V SISGA que “Ca vegada que se comercializa una botella sidre de gala internacionalmente, ta promoviéndose la Marca Asturies”
LA SIDRA.- Fernando Couto nun quinxo perdese la tastia abierta de les sidres de gala participantes nel V SISGA, cellebrada’l sábadu nel CIentru Cultura Antiguu Istitutu Xovellanos, onde pudieron probase sidres de Asturies, La Llébana, Llión, País Vascu, Catalunya, Inglaterra, Francia, Suecia, Chequia, Holanda, Italia, Eslovaquia o Austria, una oportunidá única del mercáu sidreru.
Couto asegura qu’el SISGA, nestos cinco años, llogró’l so oxetivu de promocionar les sidres non escanciables y afitar un mercáu a nivel internacional: “Les sidres de mesa son un productu exportable, polo qu’esti eventu favorez qu’Asturies y la so producción tenga accesu a un mercáu global.” El vicealcalde sentenció que dende’l Conceyu de Xixón siempres van amosar tol so sofitu a iniciatives como esta, que trabaya con productos de calidá y que busquen faese un güecu nel mercáu internacional.
