14 países europeos, 37 ellaboradores y más de 120 productos distintos participaron nel VI Salón Internacional de les Sidres de Gala –SISGA’16– .
VER SEMEYES XORNADA TASTIA ABIERTA
VER VIDIU XORNADA TASTIA ABIERTA
VER SEMEYES XORNADA SUMILLERES
LA SIDRA.- Les trés intenses xornaes del VI SISGA sirvieron pa xunir esfuerzos y xenerar sinerxes coles mires de que se reconoza l’alta calidá de la sidre que se ta ellaborando en toa Europa. Yá dende’l xueves 29 setiembre varios de el productores y dellegaos provenientes de países como Dinamarca o Polonia, y productores estatales de Tenerife o Cataluña, pudieron saber cómo s’ellabora la nuesa bébora tradicional nel llagar JR. Darréu, los 20 participantes averárense fasta’l Barriu la Sidre nel Llanu pa conocer de primer man la cultura sidrera de asturiana en Xixón.
Al otru díi, yá oficialmente’l primer díi del eventu, el Llagar Castañón foi l’escenariu de la degustación y fallu del xuráu internacional pa otorgar los premios SISGA 2016. Ellí’l tribunal compuestu por 20 especialistes de los países asistentes tastió les estremaes tribes de sidre: esplumoses –brut, dulce, semiseco y rosao–, perea, de xelu, auguardiente de sidre, llicor de sidre, les que se presenten en formatu d’un terciu y la sidre más orixinal. Esi mesmu díi pela nuechi cellebróse una Cena Gala na qu’el xef Alejandro Fernández tresnó un menú nel que s’harmonizaron platos de vanguardia colos productos que participaben nel SISGA. L’oxetivu foi amosar l’ampliu abanicu de posibilidaes qu’ufierta esta bébora como acompañante, ingrediente y componente fundamental de toa mesa y les sos posibilidaes de maridaxe con una estensa gama de productos.
El sábadu 1 d’ochobre tuvo llugar una Tastia Abierta al públicu de les sidres del SISGA na Colexata de San Juan Bautista dende les 12:00 hasta les 21:00 hores. Amás del so marcáu aspeutu internacional, afondar nel conceutu de Cultura Asturiana de la Sidre reconocía yá como Bien d’Interés Cultural de Asturies y declarada Bébora Istitucional pol Conceyu de Xixón. Tamién, foi una escelente amuesa del porqué tien méritos más que suficientes pa siguir lluchando y seya por fin reconocía como Padrimoniu Cultural Imaterial de la Humanidá pola UNESCO.
El colofón del salón foi la Xornada de Sumilleres que se llevó a cabu nel llagar del restorán El Duque. Foi un momentu de braderu alcuentru productores y profesionales del seutor nel qu’afondó nos sistemes d’ellaboración y les cualidaes organoléptiques de les estremaes sidres europees. Un espaciu pa forxar y dar puxu a llazos internacionales y llograr que la sidre algame la reconocencia que merez por cuenta de la so alta calidá, munches vegaes desfamada frente a otres bébores.
