La fototeca sidrera continúa dándomos sospreses ¿una etiqueta sidre de 1960?
LA SIDRA.- Nesta ocasión la semeya qu’alxuntamos, ye obra de Luis Cernuda Jumbo, y ta fecha ente 1960 y 1980. Trátase d’una semeya fecha nel mui sidreru conceyu de Salas, y ye bien curiosa porque la botella qu’apaez lleva etiqueta, y viendo que’l rapaz fai como si toviere echando sidre, llévamos a camentar que se trata d’una botella de sidre de les antigües… colo que quiciavis teamos énte una de les primeres botelles de sidre con etiqueta.
Cierto que tamién ye posible, como daquién apuntó, que se trate d’una botella vinu, lo que mos separtaríe de la pista de la etiqueta, pero que resaltaríe la importancia del xestu d’echar sidre, de por sigo interesante nuna semeya onde en principiu la sidre nun ye protagonista, solliñando’l calter identitariu d’esti xestu, y si se quier la rellación del mesmu -de la sidre, y del echalo- cola folixa y el tar colos collacios.
La semeya forma parte de la Fototeca d’Asturies. Muséu del Pueblu d’Asturies, bona parte de cuyos fondos puen atopase n’internet
La Fundación Asturies XXI ta trabayando nun proyeutu de fototeca sidrera, si tas interesáu /á, pues ponete en contautu con ellos en fasturies21@gmail.com
