Güei a les 22:15h va tener llugar la primer edición d’esti certame retresmitíu íntegramente na televisión autonómica
LA SIDRA.- La primer edición del Campionatu Mundial d’Echaores foi promovida pol Conseyu Regulador de la DOP Sidre d’Asturies en collaboración cola Asociación d’Echaores de Sidre d’Asturies. “Trátase d’un formatu dinámicu de cuatro programes, nos que se van llevar a cabu los enfrentamientos de los empareyamient s dende ochavos de final, cuartos, semis y final, cola idega de proclamar al Campión Mundial d’Echáu 2020” despliquen dende les entidaes entamaores.
Nel mesmu participen los 16 meyores clasificaos del Campionatu d’Asturies, que se van cruciar en razón de la so posición nel citáu ránkin: 1º contra’l 16º, 2º contra’l 15º, 3º contra’l 14º y consecutivamente. Los venceores d’esi primer duelu van pasar direutamente a la siguiente fase, quedando esaniciaos los contrincantes derrotaos.
El baremu de valoración del xuráu va centrase n’analizar el tiempu qu’entarden n’echar los seyes culetes (puntuación másima de 6 puntos), la cantidá que contienen los vasos (puntuación másima de 60 puntos), y l’estilu col qu’echen la sidre (puntuación másima 67 puntos), dexando la llende de la perfección en: 1 botella, 6 culetes, 70 segundos, 100 milillitros y estilu. Pudiendo llegar a llograr una totalidá másima de 133 puntos.
El campionatu que va tar conducíu por David Arango, y va cuntar colos conseyos sobro’l mundu sidreru, d’Alberto Rodríguez.
