Anicidad en 2003, LA SIDRA llega a los dos centenes d’ediciones en papel nun periodu por demás complicáu pa tol seutor sidreru, por eso quier agradecer tantu a los sos llectores como a tolos que conformen l’universu gastronómicu asturianu’l so sofitu y apueste por esti mediu de comunicación
LA SIDRA.- Cellebramos llegar al númberu 200 en plenu andanciu pol coronavirus, pero lo mesmo que la sidre supo salir allantre de toles cris poles que pasó esti país; nós intentamos faer lo propio, aguantando y lluchando pa siguir col nuesu llabor de dar puxu a la cultura sidrera asturiana. Esta revista nació nel añu 2003 y dende l’entamu espublizóse mensualmente amontando añu tres d’añu la so tirada fasta llegar a los 6.000 exemplares d’anguañu. Nes sos páxines recueye información sobro iniciatives, actividaes, concursos, tasties, degustaciones, crítiques, fiestes, llibros, charres, ponencies y alderiques sobro la sidre en xeneral, y convirtióse nun importante medio de publicidá de la gastronomía asturiana. Coles mesmes collabora estrenchamente cola Fundación Asturies XXI, que destaca pola organización de la Primer Sidre l’Añu y el Salón Internacional de les Sidres de Gala.
Tamos convencíos de que dengún asturianu podría entendese como un miembru d’esta comunidá ensin la sidre, pos ta presente en toles actividaes sociales más rellevantes de Asturies. Ún de los pasatos que más recordamos entre los que trabayamos nesta revista, ye la rellativa al so aniciu. Acullá pel añu 2002, cuando surdiera ente los fundadores la intención de creyar un medio de comunicación qu’encetara toles facetes rellacionaes cola bébora asturiano, surdieron duldes tocántenes a la so periodicidad. Apostar por fae una espublización mensual; sicasí, nun fueron poques les voces que dixeron: “¡Imposible! ¿Una revista específica sobro sidre que sala tolos meses? ¡Eso nun da pa tanto!”. Y agora sabemos non solo que sí, sinón que munches vegaes fáenmos falta páxines pa cubrir toles manifestaciones d’esta cultura que tienen llugar nel país.
Cumplimos 200 númberos nun momentu por demás complicáu. Ensin dulda, el más duru que mos tocó vivir como espublización. La cris socioeconómica provocada pola pandemia ta poniendo a prueba a tol seutor. Pero sabemos que dientru poco tornaremos sentir l’arume de les mazanes na temporada de mayáu; y de qu’Asturies tornará rezumir sidre nes sos fiestes y cellebraciones. Y equí siguimos tando nós, pa recoyer, cubrir y espublizar toles actividaes que surden teniendo como exa’l productu más emblemáticu d’esta tierra.
VER PDFs de la revista LA SIDRA
