La Casa Cultura de Cangues d’Onís acoyerá una esposición de les semeyes ganadores del XV Concursu Semeyes LA SIDRA
LA SIDRA.- El prósimu 15 de xunetu, na Casa Cultura de Cangues d’Onís, tendrá llugar la naguración de la esposición de les semeyes ganadores del XV Concursu de Semeyes LA SIDRA, que tarán n’esposición fasta’l prósimu 31 d’agostu.
Trátase d’una esposición de 20 obres en gran formatu (70 x 100), ente les que s’afaya la ganadora del concursu, los dos áccesits y la ganadora del premiu JR, acompañaes d’otres 16 semeyes que tamién resultaron finalistes.
El Concursu Semeyes LA SIDRA foi pioneru y sigue siéndolo de la promoción de la sidre, la mazana y la cultura sidrera, y recibió, na so decimoquinta edición -de la que se fai la esposición-, un total de 292 semeyes de 102 participantes, qu’unviaron les sos obres dende quince países distintos, repartíos per cuatro continentes.
Trátase d’un concursu internacional, entamáu pola Fundación Asturies XXI, col padrociniu del llagar JR y el sofitu de l’Asociación Asemeyando y de la revista LA SIDRA, y que yá tien convocada la so XVI edición.
Nel mesmu actu de naguración procederá a presentase l’eventu sidreru Primer Sidre de Cangues, que se desendolcará na que foi la primer capital d’Asturies, los díis 19, 20 y 21 de xuentu nel Parque Riera.
El Conceyu Cangues d’Onís vinculáu de siempres cola sidre y la so cultura forma parte de la Rede de Ciudaes Europees de la Mazana y la Sidre -CiderCities-, teniendo presentao -xunto con otros 8 conceyos de 5 estaos- el proyeutu CIDEREU na Xunión Europea, con una planificación alrodiu de la cultura de la mazana y la sidre, a desendolcar a lo llargo de 2025-2026.
Xúnete al nuesu canal de WhatsApp
