Güei, sábadu 1 de febreru cellébrase en Xixón la Espicha Honorífica a David Rivas, nel Llagar de Piñera
El 15 d’avientu del 2024 esconsoñábemos con una noticia que naide quiso creyer. David Infante ya nun daría más vueltes al sol. La incredulidá foi xeneral. ¿Ye una broma de mal gustu? ¿Ye un error? Imposible que morriera, con namás 67 años, daquién tan vivu.
Nun yera broma, nin erru; la Güestia alcontrólu n’Argañosu, onde residía los caberos años, faciendo planes pa cenes, charres, alcuentros, espiches, proyeutos que nun quedarán a medies, porque la xente que lu conoció saben que’l meyor homenaxe pa elli ye continuar el so llabor d’activista social, cultural, intelectual, políticu, sobro tou asturianu.
El curriculum d’esti economista xixonés ye ablucante: miembru de l’Academia de la Llingua Asturiana, fundador de l’asociación cultural L’Arribada, del Conceyu Asturianu de Madrid y de Conceyu Bable, llicenciáu en Ciencies Económiques pola Universidá Complutense de Madrid y doctor n’Economía pola Universidá Autónoma de la mesma ciudá, onde foi profesor de Estructura Económica; miembru del esclusivu Club de Roma, foi tamién militante activu de Conceyu Nacionalista Astur, de la Unidá Nacionalista Asturiana (UNA) y depués d’Andecha Astur, por quien foi candidatu en dos ocasiones. Foi amás secretariu del Atenéu de Madrid, miembru del Conseyu Asesor de Mediu Ambiente d’España, de la Comisión de Parques Nacionales de la Xunión Internacional pa la Conservación de la Naturaleza (Organización de les Naciones Xuníes) y de los comités de desendolcu caltenible y desendolcu rural de la Comisión Europea. Participó na creación de la Fundación Universidad Libre y fue Presidente d’Amigos de la Tierra y miembru del Observatoriu Llatinoamericanu d’Ordenación Territorial y Caltenibilidá y del Institutu Interuniversitariu d’Economía Espacial Caltenible; Repunante d’Honor, masón reconocíu y arguyosu… y tamos ciertos de que mos queden munches otres coses nel tinteru.
Pero perriba de too, David Rivas foi un namoráu de la cultura y la identidá asturiana, pola que siempres dio la cara.
Nun algamó a cellebrar la naguada oficialidá de la llingua asturiana, que siempres reclamó activamente, pero polo menos llegó a tiempu de ver reconocida la Cultura Asturiana de la Sidre como Padremuñu Universal de la Humanidá, un llogru qu’ensin dubia lu llenó d’arguyu, defensor como foi siempres de la identidá d’esti país y de la sidre como elementu clave dientro d’ella.
Sicasí, nes sos caberes declaraciones a esta revista, entá nel pasáu númberu, Rivas señalaba prudentemente que “La declaración de la Cultura Asturiana de la Sidre como Padremuñu Inmaterial de la Humanidá abre toa una montonera de posibilidaes, pero too va depender, non de la Unesco, sinón de la xestión que se faiga n’Asturies”.
David foi un de los primeros n’entamar a utilizar el conceutu de ‘Cultura Asturiana de la Sidre’, comu daqué diferenciao y específico que nun se daba n’otres fasteres sidreres.
Collaborador avezáu d’esta revista, la so obra ‘La sidra asturiana: bebida, ritual y símbolo’, del que ya s’asoleyaron delles ediciones, sigue siendo ún de los trabayos más completos sobre’l mundu de la sidre, la so su hestoria, la mazana y la so simboloxía, la so ellaboración y consumu.
Na so sópita partida David M. Rivas Infante déxanos artículos y escritos abondos nos que recuperar, polo menos en parte, la so vasta sabencia.
Alón, collaciu, van unos culinos a la to memoria.
