Tresnárense 25 corderos a la estaca y corrió la sidre en tou momentu.
LA SIDRA.- Avérase’l branu y un añu más el Llagar Menéndez invitó per ochava ocasión a tolos sos veceros a esfrutar de lo que yá ye la so tradicional espicha y asina escomenzar a esfrutar del bon tiempu colos sos tres productos: Sidra Menéndez, la DOP Val d’Ornón y Llagar de Quintana. La cellebración entamó haza les siete la tardi y tanto turismos como autocares foron llegando fasta les sos istalaciones en Fano -Xixón- onde asaron ná menos que 25 corderos a la estaca y dos llacones y n’onde tamién se pudo prebar embutíu previu al platu fuerte.
Los asistentes tamién pudieron visitar varies partes del llagar y conocer asina la nave de los toneles de maera y otru n’onde s’afayen los d’acieru inosidable. Nun se dxó d’echar sidre en dengún momentu. “Ye un detalle pa colos nuesos veceros, hai dellos que nun conocen el llagar y ye una forma de dalu a conocer” desplicó pa esta espublización Gerardo Menéndez.
Hai que dicilo too, el corderu taba nel so puntu. Y pa detras, con broche d’oru -amás de postres ente los que destacaron los carbayones y les casadielles- el dúu impacto de Moraida y David punxeron la música a la fiesta. Un festexu a lo grande nel que se caltién la tradición de les espiches y que gracies a esta triba d’actividaes caltiénense firmes ente los asturianos.
