El Muséu de la Sidre de Nava acoyó ayeri, nel mesmu salón d’actos que la viere ñacer hai dos meses, la presentación oficial de la Federación Asturiana de la Sidre Casero (Fascas)
La mesma cuntó con una escelente acoyida y l’asistencia de más de 300 persones, ente les que se cuntaben numberoses autoridaes de los distintos conceyos de los que proveníen les asociaciones participantes. Dica agora son diez, Pimiangu, de Ribedeva; l’asociación Entaína Ribeseya; Andecha Sidrera, de Parres; l’Asociación de Sidre Casero de Piloña, el Club Sierense d’Amigos de la Mazana, l’Asociación de Llagareros Artesanos del Caudal, l’Asociación de Sidre Casero de Gozón-Cabu Peñes; la Revista LA SIDRA; Onís y la acabante crear Nava Escancia.
Dar visibilidá a la Federación, abrir les puertes a nuevos socios y consolidase yeren dalgunos de los oxetivos d’esta presentación, qu’apurre a les asociaciones de sidre casero un marcu que facilite’l so llabor, yá seya a la de tratar con organismos y alministraciones, como pa entamar los sos eventos o facilitar formación, emprestando ayuda pero siempres ensin entemetese nes actividaes de caúna de les asociaciones que la conformen, como destacó na so intervención Avelino Fuentes, Presidente de Fascas, quien fixo un llamamientu al restu d’asociaciones pa que se integren na Federación, “el papel d’esta federación ye facemos más fuertes, damos más relevancia nel mundu de la sidre” declaró, resumiendo que “La nuesa intención ye xunir enfotos pa consolidar la cultura sidrera como una espresión d’arguyu, fuerza y xunidá cara a nós mesmos y cara al mundu. Promover, tresmitir, caltener la ellaboración artesano y tradicional de sidre asturiano na so modalidá casero, fomentando la tresmisión xeneracional y arriqueciéndola con talleres y cursos p’ameyorar la calidá del productu y reafitar asi esta tradición d’enraigón tradicional”, recordando tamién qu’a lo llargo del añu cellébrense n’Asturies más de 20 eventos distintos, con ésitos cuantificables y repartíos por tola xeografía asturiana, concretamente, per 19 conceyos.
De siguío intervieno Juan Cañal, alcalde de Nava, quien actuó como presidente de la Fundación de la Sidra y miembru de la Executiva de la Federación Asturiana de Conceyos. Cañal destacó la importancia de la sidre casero na consecución de la declaración de padremuñu de la Unesco, yá que ye la federación la que engloba “la base de la cultura sidrera”. Anunció tamién la nacencia de la nueva asociación Nava Escancia, que s’integra dientro la Federación y qu’arrinca con fuerza.
La directora xeneral de Desendolcu Rural ya Industries Agraries del Principáu d’Asturies, Begoña López, coincidió con Juan Cañal na relevancia de la sidre casero dientro de la esperada declaración de Padremuñu Universal “Espero que lo consigamos, y l’orixe ta nos que táis equí, calteniendo añu tres d’añu, sieglu tres sieglu la cultura sidrera que tanto nos define” declaró, resaltando la utilidá d’esta federación pa facilitar la interlocución cola alministración
Vicente Ardura, Vicepresidente de l’Asociación de Sidre casero del Caudal, fixo entrega de siguío del premiu premio al concursu del llogu pa la Federación a la so autora, Dolores Álvarez, poniendo’l ramu alactu con una interpretación a gaita y tambor del himnu de Asturies, coriáu con emoción por tolos presentes.
Dióse pasu entós a la degustación abierta de la sidre ellaborao por tolos productores de les distintes asociaciones, un perampliu abanicu de palos que recoyó la sidre que s’ellabora nes cases de toa Asturies –de llamativa bona calidá- y qu’axuntó a cientos de persones nes trés hores que duró la preba.
