Nel actu tresmitióse’l convencimientu de que por fin va algamase la declaración pola Unesco de la cultura asturiana de la sidre como Padremuñu de la Humanidá
LA SIDRA.- El Muséu de la Sidre de Nava foi l’escenariu de la entrega premios a los 10 meyores echaores de 2021, col trunfu de Wilkin Aquiles, de la Sidrería La Avenida, de Xixón, seguíu de Salvadór Ondó –Sidreríes El Mallu, Xixón y Avilés-, Jorge Vargas, tamién de la Sidrería Avenida, Jonathan Trabanco –Los Portales de Jaminón, La Pola Sideru-, Marcos Ramos (La Ballera, Villaviciosa), Pelayo Rodríguez (independiente), Rubén Campa -La Bolera, Llanera-, Junior da Silva –La Avenida, Xixón-, Alberto Truchado –La Ruta, Villalegre, Avilés, y Pablo Álvarez, -Alberto, Uviéu-
L’actu, presentáu por Saul Moro, presidente de l’Asociación d’Echaores de Sidre, foi una autoafirmación del papel de los echaores dientru la cultura de la sidre asturiana, y una espresión reiterada de qu’esta sedrá –dempués d’entardar el “Principado” 13 años en presentala– declarada pola Unesco como Padremuñu Inmaterial de la Humanidá.
Nesi sen se manifestó Begoña López, direutora xeneral de Desendolcu Rural y Agroalimentación, que tamién ensalzó’l llabor de los echaores, afirmando que “Sedremos padremuñu, esti va ser l’añu de la sidre”.
Los premios foron entregaos pola Bona Confradería de los Siceratores, imprescindibles en cualisquier actu sidreru, ainda más cellebrándose en Nava.
