Con abondu retrasu por mor de la COVID 19, fíxose entrega al Llagar Alonso del Premiu Etiqueta más guapina d’Asturies 2019, que dende va unos años concede’l Grupu de Colleicionismu Sidreru “SIDRASTUR”.
LA SIDRA.- La entrega de la placa qu’acredita’l gallardón concedíu por votación ente los socios del Grupu, suel rializase nel intre de la comida añal, a finales de Marzu o primer quincena d’Abril, anque ésti añu nun pudo cellebrase polos motivos yá mentaos.
Ello nun foi óbice pa topar una fecha y apurrir el galardón. La entrega féxose nel meyor marco que pue faese: el mesmu Llagar del premiáu, y acullá allegaron el presidente del Grupu Sidrastur Raúl Moru, que dedicó unes pallabres al Llagar galardonáu escusando’l retrasu na entrega y estimando el tratu recibíu tanto por Julio Alonso como pol so fíu Javi.
El vicepresidente y tesoreru José Ramón, “Monchu”, el Vocal y responsable del control d’etiquetes Manuel Suárez, l’encargáu de recoyer les etiquetes de dichu Llagar, Fernando Gafo, un veteranu sociu que s’encarga de les temes de sidra casero, el veteranu José González “Pepe”, y dos socios del Conceyu y veceros habituales, Veli y Mariano.
Dempués de tastiar la sidre Alonso, tanto en botella como directamente del depósitu, asina comu la nueva sidre Alonso DOP, que resultó ser bien del agradu de tolos presentes, porcedióse a la entrega de la placa acreditativa del gallardón, y de unes pallabres d’agradecimientu per parte de Julio Alonso.
Darréu y yá nel Chigre del Llagar Alonso, en Sama Llangréu, siguió tastiándose la sidre Alonso DOP y la titular del Llagar Alonso, María del Mar Camblor, estimó nuevamente’l premiu concedíu y asitiólu nun llugar preferente del so establecimientu.
A última hora, una xornada bien prestosa, enllena d’auténticu sentimientu sidreru, nun marcu incomparable y arrodiáu de xente que vive y siente la sidre como daqué propio.
