Los premios de l’Asociación Americana de la Sidre (ACA Awards) reconocen el llabor fecho por persones ya entidaes en favor de la sidre a lo llargo l’añu
La xornada entamó ceo, cola intervención d’Scott Ramsey, Director Executivu de la New York Cider Association n’alderique cola Comisionada de licores de Nueva York, Lily Fan, onde discutieron sobre como el llabor de l’autoridá en llicores puede collaborar cola industria de la sidre artesano. Darréu Debbie Morrison del llagar Yellow Belly Cidery and Sapsucker Farms en Minnesota cuntó la so esperiencia nel enfotu de facer caltenible el so negociu.
A les nueve y media abrió les sos puertes la Trade Show, una amplísima feria d’empreses qu’ufren los sos servicios a llagares y sidreríes, incluyendo dende diseñadores y vendedores d’etiquetes a enllatadores, bombes de trasiegu, programes informáticos especializaos na xestión de llagares, saborizantes, prenses y maquinaria, vasos, botelles o llimpiadores de toneles, pente otros munchos productos. La Trade Show acoyó tamién la firma de llibros sidreros por parte de los sos autores.
Tanto la mañana comu la tarde tuvieron apinaos de talleres dirixios a llagareros, pumareros y vendedores y bebedores de sidre, a los qu’asistieron centenares de persones, pero el momentu más esperáu del día foi la entrega, demientres la xinta, de los premios ACA, nos que l’Asociación Americana de la Sidre fizo entrega de gallardones a les persones y entidaes que destacaron pola so aportación al mundiu de la sidre n’estremaes estayes: Meyores vendedores de sidre al por menor, Establecimientu meyor enfocau a la sidre, Meyor distribuidor sidreru, Excelencia n’hospitalidá sidrera… toos ellos estremaos nes seyes fasteres nes que se divide’l territoriu nacional. Aparte, entregáronse los reconocimientos especiales a la Excellencia en lliderazgu dientro la industria sidrera (Aaron Safnorf Wood), Miembros reconocios de l’ACA (Nine Pin Cider Works y Benny Boy), Impautu significante na industria sidrera (Scott Ramsey y Amy Sitinson) y Defensor de la mazana del añu (Kristin M. Richard y Willan Mullan).
Finamos la xornada con un eventu ayenu a la CiderCon, pero ensiertau nes actividaes de la Cider Week (Selmana Sidrera) nel que tuvieron llugar les semifinales del campeonatu americanu d’echadores de sidre, inspiráu na sidre asturiana y la so cultura. Les finales sedrán el prósimu sábadu na CiderSummit.
