Entamu
Sigue’l mundiu sidreru dando amueses de resistencia, orixinalidá y decisión de superar les circustancies adverses, tolos díis nos chigres, llagares o pumaraes. Siguen cellebrándose eventos como la Fiesta de la Sidra de Xixón o la de Villaviciosa, y yá podemos anunciar que’l Salón Internacional de les Sidres de Gala, tamién se va cellebrar, afaciéndose a la nueva situación, pero col firme determín de siguir avanzando nel procesu de internacionalización y diversificación de la sidre.
Ye un esfuerzu enorme, dignu de toa reconocencia. La pandemia, y la forma en que ta siendo xestionada, ta afeutándonos nel díi ente díi de forma direuta, pero tamién indireutamente, xenerando una sensación d’inseguridá y provisionalidá que pue resultar tan dañible comu la mesma malura. Y esto ta resultando ser nefastu pal seutor, pa cualisquier seutor, en rialidá.
Por eso, una vegada más, dende LA SIDRA queremos reclamar un mayor compromisu istitucional col seutor, tal como fixo n’Euskadi’l gobiernu vascu concediendo subvenciones per valor de 50 millones a sus llagares, o inclusive les diputaciones de Guipuzcoa y Álava, que tamién aprobaron aídes económiques a les sos pumareros y llagareros.
Nun podemos dexar que’l Gobiernu del “Principado” siga ayenu por completu a les necesidaes del seutor sidreru. Precisamos que cumpla los sos compromisos ¿Qué pasa cola declaración de la Cultura Asturiana de la Sidra como Padremuñu Inmaterial de la Humanidá? ¿Qué pasa col Plan Estratéxicu pa la Sidre y la Mazana?
Tamién precisamos qu’estableza planes específicos d’aída pal seutor, incluyíos los chigres, cuya especificidá, dinamismu y proyección nun suel ser tenío en cuenta. El silenciu y la falta d’operatividá de los nuesos gobernantes ta saliéndomos bien caro, dexándomos n’una situación d’indefensión inaceutable y n’inferioridá de condiciones frente a otres comunidaes onde sí se da esi compromisu istitucional.
El mundiu la sidre nun ye solo’l de les fiestes, los alcuentros nos chigres y merenderos, les espichas y les romeríes, ye un mundiu d’homes y muyeres que s’impliquen presonalmente, que trabayen díi ente díi nes pumaraes, nos llagares, nos chigres; que viven d’ello y pa ello… y qu’en momentos como los qu’agora tamos pasando, precisen un sofitu.
