Entamu
L’apertura de la barra de los chigres preséntasemos esti mes como un reblagu de xigante escontra la normalidá tres unes dimposiciones sanitaries que se cebaron especialmente cola hostelería, y que tuvieron un efeutu desbastador pal conxuntu del seutor sidreru.
Lo cierto ye que por difíciles que fueren les circustancies, siempres esistió una alternativa que pudiera faer vidables, quiera que non, los eventos rellacionaos col mundiu la sidre. Concretamente, a finales del mes pasáu cellebróse la Fiesta de la Sidre Natural de Xixón con munchos retayos d’actividaes –ente ellos el míticu echáu simultáneu-, pero féxose; y en Villaviciosa acaben de cellebrar el so XXVII Concursu de la Sidre, en situaciones más normalizaes, y con trunfu de la sidre de Cabueñes DOP, a quien aprovechamos pa felicitar.
Agora mesmo los güeyos tán puestos na prósima cellebración del XI Salón Internacional de les Sidres de Gala, que tres la so cellebración online/semipresencial na anterior edición, esti añu va recuperar en bona midía la so programación avezada, y en dellos sentíos va ampliase. Ello ye qu’esti añu rescátase la Tastia Abierta al Públicu, magar namás n’horariu de tardi y con aforu llindáu, el Xuráu Internacional va cuntar con dos sesiones pa rializar les sos tasties y delliberaciones, y per primer vegada prográmase una xornada de Tasties Guiaes de participación abierta al públicu.
Trátase d’un apueste fuerte, que foi tomando forma nun tiempu nel que l’andanciu algamaba una importante incidencia a nivel internacional, y cuando paecía difícil consiguir esta media normalidá na qu’agora mos atopamos. Magar tou, tanto la organizadora d’esti eventu-la Fundación Asturies XXI-, como los mesmos llagareros, supieron sobroponese a les circunstancies y planiar pa qu’agora pueda rializase esta XI edición del Salón Internacional de les Sidres de Gala que va cuntar con amplia presencia internacional.
Otra manera, si too sigui evolucionando como s’espera, les sidreríes tornarán ser esi núcleu d’actividá y d’interrellación social que fasta agora se vio tan llindáu.
Da gustu ver les pumaraes cargaes de mazana. Hai enforma que mayar y, si tou sal bien, muncha sidre pa esfrutar.
