Entamu
Entamó fuerte esti mes d’ochobre cola cellebración del XII Salón Internacional de les Sidres de Gala –SISGA-, l’únicu eventu sidreru internacional del país, que pon a Xixón, y a Asturies, nel centru del panorama internacional de la sidre, y que magar lo exiguo de les aídes istitucionales non solo se caltién, sinón qu’esti añu superóse tantu en participación como en conteníos.
Dende LA SIDRA, como collaboradores dende’l primer intre col SISGA, queremos amosar la nuesa satisfaición polos resultaos llograos y agradecer a los convocantes, la Fundación Asturies XXI, l’esfuerciuu rializáu y la posiblidad que mos ufierten de sofitalos nesti eventu qu’asitia a la sidre asturiano como protagonista a nivel mundial.
D’otra miente, esti añu recupérase con rixu Xixón de Sidre, y amás faelo con una bien importante novedá, cola DOP Sidre d’Asturies como partener, una auténtica meyora na calidá del eventu y un aciertu de la DOP asitiándose, una vegada más, nel centru de l’actualidá sidrero, apostando por tar presente nos prinicipales eventos sidreros que se realicen en Asturies.
Y ente otres munches actividaes interesantes que se vinieron rializando y otres tantes que s’anuncien, destacar qu’a finales de mes apurriránse los Premios Mundo Collada’22 a la meyor sidre casero d’Asturies. Una cellebración referencial nel panorama sidreru asturianu que sirve de colofón a los munchos concursos de sidre casero que se fain per tola xeografía asturiano, espresión de la vitalidá de la cultura sidrera asturiana y un auténticu lluxu que dengún amante de la sidre pue permitise ignorar.
Finalmente, los llagares yá escomenzaron a mayar, y como yera sabío, esti añu la vecería va a más y pior, con bien poca mazana asturiano –cola esceición quiciabes de la mazana acoyío a la DOP Sidre d’Asturies y con un trasiegu incesante de mazana de toa Europa que vien compensar la incomprensible falta de planificación del seutor, incapaz de responder a la propia demanda interna, por más qu’esta seya fácilmente predecible d’un añu a otru.
