Entamu
A finales de la primavera atrópense les actividaes sidreres de forma impresionante, con fiestes y festivales de la sidre a cual más popular, en Muñó, en L’Entregu, Onís, Cuaña, Carbayín, Uviéu, Xixón… la vitalidá de la cultura asturiana de la sidre pue llegar a ser estresante pa quien queremos esfrutala en toles sos espresiones.
Pero esti mes el protagonismu llévalu la DOP Sidre d’Asturies, que consiguió comprometer a les sidreríes llanisques, que realizó en Cangues d’Onís el so segundu Salón de Sidres Esplumoses, qu’empecipió una rellumante campaña de branu “Tasca la etiquetina”, y que cellebra esti mes n’Uviéu’l so Salón de les Sidres de Asturies.
Destaca tamién Nava, que non solo cellebró con un D’Sidres Folk Fest el Día Internacional de la Sidra, sinón que presenta una programación estupenda pal prósimu Festival de la Sidre de Nava; y onde el Muséu de la Sidre va alquiriendo ca vegada mayor protagonismu, acoyendo nel so espaciu toa triba d’iniciatives venceyaes cola sidre, y presentando una bien interesante programación pa lo que queda d’añu.
De destacar asina mesmo la Preba de Gascona, un auténticu fenómenu social con una impresionante capacidá de convocatoria que reivindica’l protagonismu de la capital asturiana nel panorama sidreru.
N’otru orde de coses, sigue la problemática cola botella sidre ‘Molde Fierru’, viéndose con esmolición nel sector la posibilidá de que la propietaria de la marca rexistrada –l’Asociación de Sidra Asturiano, ASSA- pretenda cobrar pol usu d’esta botella a los que tan ensin acomuñar. Pel momentu nun hai ná definitivo y hai que reconocer que la prudencia que ta amosando esta asociación facilita la posibilidá d’una solución dialogada.
Dende estes páxines yá alvirtiéremos que la dexación de funciones del ‘Principado’ a la hora de defender el padremuñu asturianu que representa la botella sidre diba acarretar problemes, de tala miente que nesti momentu la única alternativa que podría satisfaer a toles partes sería la so declaración como Bien d’Utilidá Pública, recuperando la botella ‘Molde Fierru’ pal llibre usu por tolos asturianos. Eso sí, previa reconocencia al bon llabor rializáu por ASSA, y una indemnización acionada que los indemnice convenientemente non namás de los gastos, sinón de los riesgos asumíos.
