Entamu
Viémosmos obligaos a retrasar la edición d’esti númberu de LA SIDRA énte la sospresiva anuncia del refugu pola Unesco de la candidatura de la cultura asturiana de la sidre como Padremuñu Inmaterial de la Humanidá.
Un fracasu difícilmente mesurable que se ve agraváu pola comunicación, per parte del ‘Principado’, d’una versión poco creyíble de lo asocedío, con contradiciones evidentes y nun facilitando la rempuesta oficial de la Unesco.
Fáltenmos pallabres y sóbramos decepción.
D’otra miente, esti mes de xunetu taba siendo especialmente positivu pa la sidre, nel que’l Festival de la Sidre de Nava tuvo un especial protagonismu y nel que se vieron detalles de renovación interesantes, anque sigue echándose de menos l’asturianía: música asturiana, folclor asturianu, llingua asturiana… en cualisquier casu, esta foi una edición más qu’afortunada, que va marcar enclín.
Pela so parte, tenemos de destacar nuevamente’l dinamismu de los concursos d’echaores, tamién en fase de renovación; y bien especialmente de los concursos de sidre casero, cuyu rixu sigue sosprendiendo, y onde s’adica una ca vegada mayor participación de xente mozo, auténtica garantía non solo de continuidá, sinón de superación.
Polo demás, nesti mes nel que tenemos al sol como castigu, repítense les fiestes de prau, onde la sidre gocia d’estupenda salú ¡Qué dicir d’El Carmín!, y apúntense eventos especialmente sidreros como Les Piragües, el Xiringüelu o San Timotéu… les espeutatives son estupendes.
Lo único qu’esmolez un pocu ye ver les pumaraes con poca mazana y el camentar en cómo van vese afeutaes pol escesu calor ¡que nun falte mazana! ¡que nun falte sidre!
Y yá a la fin, la espera de dos eventos emblemáticos: la Fiesta de la Sidre de Xixón y el Salón Internacional de les Sidres de Gala; y ye que magar incapacidaes ya incompetencies istitucionales, la sociedá civil asturiana ye la mayor, l’auténtica garantía de pervivencia del seutor, la que caltuvo con puxanza la cultura asturiana de la sidra y la que la vive y refuercia díi ente díi.
