Entamu
Mayullargu sidreru
Nel mediu rural asturianu, al mes de mayu conózse-y tamién como mayullargu, por ser esti un mes nel que non solo aumenten de forma considerable los díis, sinón y sobromanera, porque nesi mes atrópense la mayor parte de les actividaes agrícoles y ganaderes, de tala miente que les xornaes paecen nun tener fin.
Con éses, nel tarrén sidreru asturianu tamos viviendo un auténticu mayullargu, onde s’atropen les cellebraciones sidreres, -unes de calter públicu, y otres priváu, ente familia y amigos- de tal modu que da la impresión de qu’esto nun s’acaba.
No que va de mes, vien cellebrándose ente otros munchos eventos ‘La Mar de sidres d’Asturies’, el LXVII Concursu Nacional d’Echaores y la XXIV Fiesta de la Sidre en La Felguera, en Sotrondio cellebróse’l XIII Certame de la Sidre, la espicha de San Felis en Valdesoto, la de tonada y gaita en Ponga, trés concursos d’echáu de sidre, presentación de sidre rumano, fallu del XIV Concursu Semeyes LA SIDRA, tastia guiada de Sidra Cortina, echáu universitariu de sidre, alcuerdu de la DOP con hostelería de Llastres, taller d’echáu de sidre en Xixón, presentación de ‘Sidra de Primavera’ de Castañón, d’Exner en Madrid… y lo que mos queda per delantre.
Allegrémonos entós d’esti remanecer sidreru dempués de dos años de restricciones sanitaries, y miremos con optimismu’l futuru que se mos presenta, onde yá hai convocatories inmediates como la Preba y el primer festival internacional de sidre en Gascona, y anúnciense otres a curtiu plazu como’l Salón de la DOP Sidre d’Asturies o el Festival de la Sidre de Nava, y a mediu plazu, como la Fiesta de la Sidre en Xixón o el Salón Internacional de les Sidres de Gala, por citar dalguna d’elles.
D’otra miente, col bon tiempu tornen enllenase sidreríes y merenderos, escomiencen a cellebrase los concursos y degustaciones de sidre casero –manifestación fundamental de la vixencia y el puxu de la cultura asturiana de la sidre- y nun hai romería onde la sidre nun campe polos sos fueros y plenos derechos.
Mentanto, siguimos esfrutando de les primeres sidres del añu, ca vegada comercializaes por más llagares, y dexando que la sidre siga arredondiándose en tinos y toneles, a la espera de la so pronta y feliz degustación.
