Entamu
Llega la primavera, por más predecible que seya, siempres resulta una noticia prestosa. Escomiencen a floriar los pumares y la sidre nos llagares pide salir al alcuentru merenderos y fiestes de prau con un anováu ímpetu.
Tenemos al delláu la Primer Sidre L’Añu, en selmana santa, l’eventu col qu’entama la temporada sidrera asturiana, y tamién esa nueva sidre de la pasada collecha, la sidre sobro la madre, la sidre de primavera, la primer sidre… Ye l’auténticu ‘ciclu de la vida’, la renovación perpetua y la promesa d’una nueva temporada na que too tien que dir necesariamente a meyor, percima de les circustancies, cumpliendo coles nueses meyores aspiraciones.
Y la Primer Sidre l’Añu preséntase de nuevu nel espectacular marcu que supon el Muséu del Pueblu d’Asturies, cellebrando la mayor espicha del país, cola elleición de la Meyor Primer Sidre del Añu, l’Asturianada y Sidre, el míticu Sidracrucis y el concursu de la Meyor Sidre Fecho en Maera… un programa completu, pa toles edaes, que dota de conteníu esti eventu sidreru, col que se da pasu a una temporada que se mos presenta apinada de convocatories.
Enagora los Siceratores yá convocaron el so IX ‘Axuntábense’, les asociaciones de sidre casero empecipien a tresnar los sos eventos y anúnciense ¡por fin! les primeres fiestes de prau. El remanecer.
Otra manera, a díi de güei nun s’anuncien novedaes al respeutive de la candidatura de la la cultura asturiana de la sidre na Unesco; siguimos pendientes de que’l Muséu de la Sidre de Nava cunte con un nuevu direutor, y conocer les sos propuestes pa la necesaria revitalización del proyeutu. Agora mesmo, en plenu periodu preelleutoral, tampoco nun se presentó denguna propuesta política específica y concreta pal desendolcu del seutor de la sidre, por más que tea enriba la mesa la necesidá d’un Plan Estratéxicu de la Mazana y la Sidre… Pero llega la primavera, y de xuru que con ella va haber bones noticies.
Pa baxar el PDF fai falta tar dáu/da d’alta nel whatsapp de LA SIDRA
(Visited 2.890.764 times)
