Entamu
Ye febreru mes de transición y d’escomienzu, de transición mentes s’espera a tener en condiciones la que sedrá la primer sidre l’añu, y d’escomienzu no qu’a los curiaos de los pumares se refier; tiempu llantar y tiempu fradar. Un momentu d’espera y de preparación.
Tres la digna presencia de la sidre asturiana en FITUR y en Madrid Fusión, anúnciase agora la cellebración en Madrid Gourmet del que sedrá’l I Campionatu Mundial d’Echaores, una rellumante iniciativa qu’ensin dulda dará a conocer y promocionará la nuesa sidre, y l’arte d’echala, pero qu’agüeyando la situación que se vive n’Asturies, onde la figura y categoría del echaor nun ta nin reconocía nin pagá, resulta en cierta miente contradictoria y espierta toles allarmes. Corremos el pelligru de convertimos nuna caricatura de nós mesmos, vendiendo un ‘paquete temáticu sidreru’ pa una Asturies onde nun se respeta a estos profesionales, y onde –en consecuencia- díi ente díi son más difíciles d’alcontrar.
Per otru llau, los nuesos vecinos vascos vienen de nagurar la so campaña sidrera cola cellebración del Txotx, con una menor produición de sidre, pero a la qu’atribúin más calter y daqué más de graduación alcólica, paga la pena pasar a prebala.
No que cinca propiamente a los chigres, parte fundamental del seutor de la sidre y la mazana que non siempres son teníos debídamente en cunta, queremos destacara la so vitalidá pesia les abegoses circustancies nes que mos movemos, y mui concretamente’l so esfuerciu por xenerar orixinales xornaes gastronómiques, nes que polo xeneral poténciase’l productu autóctonu y por supuestu la nuesa bébora patria.
Pocu más qu’amestar, esperar que pa les prósimes elleiciones asturianes los partíos políticos tómense la molestia de presentar propuestes pal seutor, aguardiar el prósimu nomamientu de direutor del Muséu de la Sidre asturiana en Nava, y preparase pal prósimu Sidracrucis y la Primer Sidre L’Añu, ¡Que yá les tenemos al delláu!!
