Entamu
La presencia de la sidre en Fitur y Madrid Fusión superóse esti añu, alquiriendo un mayor protagonismu y algamando una mayor calidá na so presencia nos actos públicos.
Hai motivos pa tar satisfechos, pero convién poner les coses nel so sitiu: la sidre, la cultura sidrera asturiana polo xeneral, ye un bon gabitu p’atrayer turistes al nuesu país, pero’l turismu que vien a Asturies nun va tener mayor incidencia nel consumu de sidre, anque sí del sidraturismo.
Ye importante tenelo nidio, la triba turismu al que se ta dando puxu p’Asturies –masificáu, perestacional y de baxu presupuestu- nun va consumir sidre. Tomará una botella ente seyes o ocho persones por aquello del tipismu y va sacar una docena semeyes al echaor, pero va siguir la xinta con un Albariño o un Rioja.
Lo que sí va dase –yá ta dandose- ye un aumentu del sidreturismu, especialmente la visita a llagares. Ye una esperiencia distinta, auténtica y de baxu costu que resulta bien atractiva pal turista mediu, y que de xuru va dir desendolcándose ca vuelta más.
En tou casu nun cabe dubia dala de que la demanda de sidre nun va variar de forma significativo pola masificación turístico. El so consumu –la natural especialmente- ta básicamente xuncíu a los vezos de consumu de la población asturiano, y por eso’l so desendolcu ta venceyáu a la fin de les polítiques dirixíes a forciar la emigración de la nuesa mocedá, y darréu, a la meyora del nivel de vida y capacidá de consumu de la sociedá asturiana; asina como a la reafirmación y tresmisión de la nuesa cultura identitaria. Nun hai qu’engañase.
D’otra miente, febreru ye un mes un pocu de transición. Nun hai práuticamente eventos sidreros, siguimos sollertes a la evolución de la sidre nos toneles… y pal mes que vien la XIV Primer Sidre l’Añu, pero ainda queda tiempu pa eso, asina que va haber que siguir aprovechando les ventayes d’esti cambiu climáticu y esfrutanto de los merenderos, que –quién lo dixere- esti mes de febreru paecen tar faciendo un bon agostu, de lo que mos allegramos.
Pa recibir el PDF de la revista fai falta tar dáu/da d’alta nel whatsapp de LA SIDRA ¡Gratis!
