Entamu
La entrega premios a les meyores sidres d’Asturies d’esti añu, costitúi ensin dubia’l puntu álxidu del mes pasáu en términos sidreros, y una demostración del bon estáu d’esta DOP, que sigue calteniendo un escelente nivel magar la situación na que mos atopamos.
Nel mesmu sen, nun podemos dexar de destacar l’aciertu que supunxo’l saber implicar a un pueblu como Tazones, referente turísticu de primer orde, na promoción de la Sidre d’Asturies. Ye importante que se siga poniendo en valor cómo’l consumu de sidre ellaborao con mazana asturiana aída a caltener y rexenerar el campu asturianu, dándo-y viabilidá y promocionando’l caltenimientu y desendolcu de pumaraes.
Asina mesmu, ye de xusticia reseñar que’l Campionatu Oficial d’Echaores d’Asturies va coyendo ritmu adulces, y yá non solo pola calidá de los participantes y lo axustao de la puntuación, sinón por cómo les fiestes llocales ca vegada s’impliquen más nesta triba campionatos que tantu dicen y en tantu dignifiquen esti oficiu, indesplicablemente valeru de reconocencia oficial como talu.
A estes altures entá hai munchos eventos sidreros que la so viabilidá resulta dudosa, por cuenta de la situación sanitario del momentu, pero tou paez indicar que la Fiesta de la Sidre de Xixón va cellebrase esti añu, quiciabis non como en dómines “normales”, pero va cellebrase, y el XI Salón Internacional de les Sidres de Gala –SISGA- yá confirmó la so cellebración la primer fin de selmana d’ochobre, y qu’esti añu inclusive va haber tastia abierta al públicu.
Hai munches ganes de normalizar y recuperar el tiempu perdíu, y bramente ye una auténtica satisfaición ver l’actividá de terraces y merenderos, un pocu más llindada cuando d’interior de sidreríes se trata, pero tou avanza escontra esa normalidá que tantu precisamos.
Son pos momentos que, ensin ser bonos, anuncien tiempos meyores, tiempos que se ganó’l seutor sidreru col so esfuerzu y compromisu magar la reinal orfandá istitucional que se carez.
Y les pumaraes siguen cargaes de rica mazana, anunciu tamién de bonos tiempos, de tiempos pa esfrutar la sidre, la nuesa sidre.
