Entamu
El mes de xunetu ye pal Festival de la Sidre de Nava. Nun ye pa menos, non solo pola so veteranía, sinón pola so capacidá de convocatoria y el calter referencial tantu del so concursu de sidre como más apocayá’l d’echaores. Pero ye qu’amás esti festival ta llevando a cabu un importante esfuerzu en redefinise y afaese a los nuevos tiempos, nun procesu que nun ye fácile, nin siempres tien por qué atinase a la primera, pero que resulta necesariu dafechu cara a la proyeición y dignificación de la nuesa bébora patrio.
Importante tamién el gran númberu de cellebraciones que siguen rializándose y que tienen a la sidre como principal protagonista, y sobromanera a la ca vegada mayor vitalidá de los concursu de sidre casero; una amuesa de la enorme vitalidá de la cultura sidrera asturiana, y un apueste de futuru nel que munchos llagares industriales tán collaborando, y que tuviera de potenciase muncho más si queremos que les nueves xeneraciones d’asturianos aguanten el xabaz procesu de aculturización al que tamién se ven sometíos nesti campu.
Y la Universidá tamién s’implica, nesti casu la UNED, qu’esti añu inclúi nos sos cursos de branu ún cientráu nes conocencies y nes práutiques venceyaes a la cultura de la sidre asturiano, del que vamos informar prósimamente, y que resulta bien esperanzaor cara a la necesaria implicación de tolos seutores nel espardimientu y promoción de la cultura asturiana de la sidre.
Folixa, concursos populares, implicación universitario… suena tou estupendo, pero tamién hai retos, preveese qu’esti añu va haber nueva collechona –como tolos años impares- y los pumareros yá tán viendo que nun va ser fácile colocar la produición. Siguimos ensin dengún tipu d’avance no que cinca a la presentación de la nuesa candidatura a la UNESCO, y el cartelu anunciaor de la Fiesta de la Sidre de Xixón d’esti añu recula a los sos piores tiempos escluyendo de forma absoluto la nuesa llingua, ya inclusive nun respeta la toponimia oficial –Gijón/Xixón-. Mal, eso ta mal.
Acabemos con daqué bono: El Salón Internacional de les Sidres de Gala yá convocó la so novena edición pa la postrer fin de selmana de setiembre, y esti añu va haber novedaes, asina que ¡sollertes!
