Entamu
El Salón de la Sidre DOP atropa’l protagonismu d’esti xunetu lluviosu nel que destaca sobromanera’l Festival de la Sidre de Nava, y compleméntase col ensame de fiestes de prau onde la sidre ye inevitable protagonista – con munchos concursos de sidre casero, por cierto-, y col resurdir de l’actividá en merenderos, ainda cuando esti branu asturianu nun tea dando especiales allegríes climatolóxiques.
Del Salón de la Sidre DOP muncho que dicir, tantu que ye oxetu d’un especial que complementa la información qu’apaez nesta edición de LA SIDRA, solliniar que se cumplen de forma satisfactoria les meyores espeutatives y que les previsiones pa un futuru inmediatu resulten especialmente afalagueres.
El Festival de la Sidre de Nava remonta una nueva edición na que se confirma’l procesu de renovación y actualización de formatu, pero calteniendo les sencies que-y son propies y que faen d’elli, con xusticia, una referencia esperada por tolos amantes de la sidre que nunca defrauda.
Per otra parte, esti mes paez confirmase que por fin va presentase la propuesta de candidatura de la cultura asturiana de la sidre como Padremuñu Inmaterial de la Humanidá de la Unesco, pa 2019 ¡Con 9 años de retrasu y cuando otres candidatures anunciaes con posterioridad yá se vieron reconocíes!! En cualisquier casu, paez que la Conseyería de Desendolcu Rural tornó a entamar l’actividá que desdexó en 2014 , y per otra parte Foro Asturias presentó una Proposición Non de Llei al “Principado” pa que la propuesta de candidatura preséntese a España en 2019. Ye importante.
D’otra miente, anúnciense estupendes espeutatives sidreres pa lo que queda’l mes y el que llega, la Fiesta la Sardina y el Ralliye de la sidre en Candás anteceden a la fiesta les Piragües de Ribeseya y Les Arriondes, y al xiringüelu de Pravia; y ente unes y otres, munches fiestes llocales d’altu conteníu sidreru, como San Timotéu en L.luarca, y como el tiempu aide daqué, bien d’oportunidaes pa esfrutar de la sidre. Nun futuru inmediatu la Fiesta de la Sidre de Xixón y un pocu más acullá el Salón Internacional de les Sidres de Gala.
