Entamu
La sidre ta reinventándose, nel mundiu y n’Asturies. Nun son namás los nuevos productos que surden y les munches posibilidaes qu’ufren los meyores medios téunicos y la globalización de los mercaos, sinon de la forma na qu’apaecen nueves espresiones de los eventos sidreros y en comu se desendolca la nuesa cultura de la sidre.
De les espiches y les fiestes y festivales de la sidre, que se caltienen con enforma puxu, foron desendolcándose otres espresiones de calter festivu como la Preba de Gascona o la Primer Sidre l’Añu, que consiguió recuperar la sidre sobre la madre; gastronómiques como Xixón de sidre, internacionales de nueves sidres y gastronomía como el Salón Internacional de les Sidres de Gala; y mesmamente los concursos de sidre casero que tanto dinifiquen la nuesa tradición sidrera; o incluso artísitico como el Concursu Semeyes LA SIDRA o agora el Sidre Sound. Foise evolucionando haza otra triba d’eventos ca vuelta más complexos na so conceición y con una visión más xeneral del mundiu la sidre y de la nuesa cultura sidrera.
Eventos como Espalma la Sidre en Siero o Exposidre en Nava apunten peralto y lo que ye meyor, abren puertes ensin presllar ventanes, consiguiendo complementar esti continuum gastronómicu, festivu y cultural que representa la sidre nel nuesu país, nel que namás s’echa en falta un mínimu de sofitu istitucional.
Per otru llau cotinúa l’etenru alderique sobro’l preciu de la sidre, si ye barato, si ye caro. Nun vamos entrar nello de nueu, pero si queremos esclariar que nun ye lo mesmo poner en valor un productu qu’aumenta-y el preciu, y qu’un erru de criteriu en talu sen pue tener como consecuencia resultaos contrarios a los deseyaos.
Y a la fin destacar la Sidre d’Asturies DOP, cuyu Salón apaecerá recoyíu nel prósimu númeru de LA SIDRA, que marca especialmente l’actualidá d’esti mes sidreru per demás. Paez que tan faciéndose les coses bien, y tan viéndose los resultaos, merécense la nuesa felicitación. Non solo d’esta revista, sinon de tola sociedá asturiana. ¡Norabona pol trabayu rializáu!
