Entamu LA SIDRA 171

Entamu

Cola sidre nuevo nos llagares, esti mes de marzu preséntase con bones perspeutives. Les primeres espiches escomiencen a cellebrase, y ente elles, y dando’l pistoletazu de salida pa esta nueva campaña sidrera, la Primer Sidre L’Añu (PSLA), la mayor espicha del mundiu qu’esti añu preséntasemos con bien bona sidre y con interesantes novedaes.

Y el Sidracrucis, nun hai d’escaecese del Sidracrucis, la “pasión sidrera”, la procesión más asturiana de tola Selmana Santa, l’actualización festiva de la tradición de percorrer les espiches demientres estes festividaes. Una tradición que per otra parte entá se caltien con especial puxanza, especialmente na cuenca minera, por más que la falta de sofitu istitucional torgue’l desendolcu que se merez tantu pol so calter identitariu como pola so proyeición mediática y turística.

Y falando d’istituciones, dende la Conseyería de Mediu Rural tornaron a realizar una piquena campaña mediática alredior de la prósima solicitú de reconocencia pola UNESCO de la Cultura Asturiana de la Sidra como padremuñu de la humanidá. Si dalguna vegada tovieron vergoña ye nidio que la perdieron: candidatures que s’anunciaron al mesmu tiempu que la nuesa yá consiguieron ser reconocíes, y mentantu, el “Principado” entá nun foi quien nin siquier de presentar la candidatura.

En cualisquier casu, perriba de tanta incapacidá y desenfotu, el rixu de la sidre y de la cultura, que los asturianos supimos entetexer al so alrodiu a lo llargo de los sieglos, sigui gociando de bona salú, y lo que ye más importante, siguimos dimpuestos a continuar esfrutándola, afayando la so espresión a los nuevos tiempos y a la nuesa conocía capacidá de compartila ente nós y ente toes aquelles presones que mos visiten.

N’Asturies la sidre xune, y failo muncho más acullá de lo que ye la bébora en sigo. Xune socialmente, identitariamente, anímicamente; y nesta primavera qu’acaba d’escomenzar nun hai dubia de que vamos saber recurrir a ella. Con xacíu, porque asina ye la nuesa cultura y porque esa ye la nuesa responsabilidá, según reza l’eslogan que dende LA SIDRA entamemos a esparder.