Entamu LA SIDRA 167

Entamu

Esti mes de payares pasemos de la gayola por ver les nueses pumaraes atarraquitaes de mazana a entrugamos cómo ye posible qu’esa bayura costituya un problema. Tanto ye asina que dicha problemática empañó la natural allegría qu’acompanga a la mayada de la sidre y la cellebración de los magüestos, sabia y tradicional combinación de la sidre’l duernu y les castañes amagostaes.

El problema ye fácile de definir, esti foi un añu bonu en mazana, una añu de collechona, como correspuende a la endémica vecería, y como consecuencia, la ufierta de mazana asturiana algamó niveles hestóricos… pero los llagares nun paecen tener capacidá o interés n’alquirir una mazana que, per otru llau, resulta muncho más caro que la trayía d’otres partes d’Europa, y son munchos los collecheros –n’especial los más piqueños, que compatibilicen la produición de mazana col restu d’actividá agrícola-ganaero- que tan viendo como empodrez la mazana nes pumaraes ensin ver forma colocalo en dengún llagar.

Ye nidio que la vecería nun ye bramente’l problema –darréu que s’espera tolos años impares- el problema ye la falta previsión y ordenamientu del seutor y l’ausencia d’unes llinies d’actuación conocíes y aceutaes peles partes, daqué que depende esclusivamente de los nuesos representantes políticos, del “Principado”, qu’una vuelta más non solo nun cumple cola so función, sinon que llega a culpabilizar a los propios collecheros de la situación y a remembra-yos que tamos baxo les lleis de la ufierta y la demanda.

Ye preciso tener nidio que baxo les estrictes lleis del llibre mercáu la mazana asturiana, ya incluso la mesma sidre, tendríe permal futuru, munchu pior n’ausencia d’un gobiernu propiu que defenda los nuesos intereses y que cunte cola necesaria planificación y programación de futuru pal seutor. Un país piqueñu, coles nueses carauterístiques orográfiques y la situación demográfica a la que mos llevaren, namás tien posibilidá de sobrovivencia baxo unos principios económicos identitarios onde ca ellementu de la cadena productiva retroalimente a toes y cauna de les partes de la mesma.

Una vuelta más l’ausencia d’un gobiernu asturianu ta resultando estremadamente caro a los asturianos, y otorgar un valor amestáu a los nuesos productos ye la rempuesta más llóxica pa paliar esta situación.