Entamu

La prósima presentación de la nueva collecha de sidra de la DOP Sidre d’Asturies va marcar ensin llugar a duldes esti mes de xunu, confirmando con toa probabilidá lo que ye un fechu costatable: la interesante progresión d’esta marca identitaria y de calidá cuya evolución nos tiempos caberos ta resultando altamente positiva, tantu na forma como nel fondu, daqué a lo que nun ye ayeno la reglamentación de Sidreríes d’Asturies como marca de calidá, pa cuyu algame ye preciso –ente otres condiciones- que les sidreríes cunten na so ufierta con dalguna marca de la DOP de Sidre d’Asturies.

Aprofitamos tamién pa dar l’afayaivos a la DOP Eusko Sagardoa, qu’escomienza con rixu la so andadura gracies al sofitu del so gobiernu, y que yá dende un entamu reconoz a 115 races de mazana de les aprosimaes 500 races vasques esistentes. Ná que ver col casu asturianu, tanto pola nuesa reinal falta d’un gobiernu propiu que mire polo nueso, como por lo exiguo de les races reconocíes ¡22 de les más de 2.000 variedaes autóctones! En tou casu, les nueses felicitaciones al País Vascu, y ¡afayaivos!

D’otra manera, equí siguen repitiéndose les avezaes dinámiques de asturfobia: la corporación municipal d’Uviéu (PSOE, Somos, IX, PP, C’s) tornó a recurrir al “vinu español” pa les cellebraciones oficiales, en públicu y repitíu despreciu tantu a la sidre como al vinu asturiano. Indesplicable, inxustificable.

Per otru llau, yá s’anuncia’l branu, y los eventos sidreros más qu’asocedese, asolápense. Pero hai referencies que nun podemos dexar de siñalar, como ye’l casu del Festival de la Sidre de Nava, qu’encara la so cuadraxésima edición coles meyores perspeutives, y qu’inclúi pa esti añu delles novedaes coles que busca dir anovándose pasu ente pasu. Bramente les fiestes y festivales sidreros precisen una nueva reformulación p’afaese a los nuevos tiempos, hai que caltener el so calter popular, pero tamién hai que guetar mecanismos qu’aíden a prestixar el productu, y por supuestu xuncilos y complementalos con elementos propios de la cultura asturiana de la sidre.

Ye un retu difícil pero imprescindible, y hai que faelo enantes de que les fórmules actuales lleguen a escosase, porque entós va resultar muncho más complicao reinventase y consiguir l’impresionante siguimientu popular col qu’agora se cunta.

Falamos de sidre, y hai que movese.