Entamu

La esitosa presentación de la nueva collecha de Sidre d’Escoyeta, cola so sidre sobro la madre, ye la continuación perfecha de la Primer Sidre L’Añu y la confirmación práutica de como pasu ente pasu va consiguiéndose recuperar esa modalidá de sidre que tuvo a puntu perdese pola industrialización. Falta saber si la llexislación española contempla la esistencia de la mesma, y nun pasa como cola sidre de pera, y tamién esclúi esa denominación.

Y ye que la nueva llexislación española no que cinca a la sidre nun ye tan mala como l’anterior, pero, la verdá, ye más mala que bona, fecha dende la inorancia d’un estáu que nun ve muncho más acullá del vinu y en tou casu d’espaldes a la tradición, cultura y economía asturiana. Lo de siempres.

Pero ye que nesti estupendu mes de floriar del pumar acumúlensemos les desdiches. Acabamos d’enteramos al traviés de Foro de que nel País Vascu, con una produición de sidre cuasique 10 vegaes menor, el so gobiernu invierte 12 vegaes más en publicitar la so sidre que’l “Principado”. Les cifres son nidies y de nueu carecemos les consecuencies de nun tener un gobiernu propiu, sinon un “Principado” empeñáu en facer d’Asturies un barriu de Madrid.

Por si too esto pudiere abultamos poco, el “Principado” perafítase na llexislación que prohíbe canciar o tocar la gaita nos chigres, anque sí que lo permite nos tablaos flamencos… tan asturianos y tan abondosos nel nuesu país.

Fortunósamente la sociedá civil asturiana tien capacidá pa superar toos estos despropósitos y ye un auténticu placer ver la vida que tienen merenderos y chigres y cómo se suceden los eventos sidreros, esti mes el de Ribeseya y Sotrondio, el que vien el de L’Entregu, el de Llaviana, y asina sucesivamente.

Mención aparte merez La Preba de Gascona, espeutacular por drechu propiu, una auténtica esibición de calidá, asturianía y amor pola sidre: referente obligáu qu’añu ente añu supérase y de cuyu exemplu nútrense eventos asemeyaos. La so aportación a la cultura asturiana de la sidre ye más que destacable y ye xusto reconocelo asina.

Y por supuestu, lo meyor de too ye qu’un mayu bonu agoria un xunu meyor.