ENTAMU

La Primer Sidre L’Añu –PSLA- marcó de forma nidio l’actualidá sidrera d’esti mes d’abril, dando’l pistoletazu de salida oficial a un nueu añu sidreru onde les espectativas paecen ser más que bones.

Independientemente del ésitu collecháu por esta yá ochava edición de la PSLA y la so importante contribución a recuperar les espiches de Selmana Santa y la sidre nuevo, lo cierto ye qu’a lo llargo d’estos años, la PSLA costituyóse de forma inequívoco como l’eventu que marca l’empiezu del añu sidreru, supliendo una falta que llevábemos abasnando dende siempres y que robaba a la sidre asturiano la merecía presencia mediática tantu a nivel estatal como internacional, colo qu’ello supon a nivel de restauración, turísticu ya inclusive políticu, al poner al seutor sidreru asturianu y per ende a Asturies como protagonista nel panorama internacional.

La globalización na que vivimos desixe xenerar ellementos referenciales de calidá que faigan visible la nuesa presencia y mos permita reivindicar el nuesu papel de llideralgu nel mundiu de la sidre, y la PSLA ta contribuyendo de forma notable a ello.

Pero hai más, y ye daqué que non siempres se sabe apreciar debidamente, el calter popular y festivu de la cellebración dexa potenciar a les sidreríes y a la sidre precisamente nel grupu d’edá que, secundariamente a la aculturización que carez, más se ta alloñando d’ella en beneficiu de productos como la cerveza. Recuperar l’aspeutu dinámicu, xuvenil, positivu y de sana diversión tamién ye un oxetivu que consideramos cumplíu. Nesti sen ¿qué dicir del yá míticu Sidracrucis?

Por eso ye d’estimar el sofitu recibíu de tol seutor, llagareros, distribuidores, sidreríes… pero tamién del seutor turísticu, agroalimentariu ya istitucional, del Ayuntamientu Xixón y del propiu “Principado”. Ente toos vamos siguir llevando a más la PSLA.

Per otru llau, les actividaes sidreres dispárense. La Felguera yá cellebró la so fiesta de la sidre, y Sotrondio, L’Entregu y Llaviana tresne les suyes, Gascona va cellebrar prósimamente la so Preba, los concursos d’echadores arrinquen con fuerza, les espichas de mayu son infinites, la sidre ta presente en toles fiestes asturianes y con elles los concursos de sidre… entama un nueu añu sidreru, y failo con fuerza.