Entamu

Finada la mayada na práutica totalidá de los llagares, y cola sidre en plenu procesu de formientaura en toneles y tinos, ye’l momentu de dexar que la natura siga’l so cursu y lleve a bon términu tol esfuerzu rializáu.

De nueu en navidaes les cellebraciones repitense y los alcuentros festivu-gastronómicos con compañeros, collacios y familiares son una feliz costante qu’hai qu’aprofitar pa percorrer l’ampliu abanicu de sidre que tenemos nel mercáu, escomenzando pola natural pa siguir cola de nueva espresión, la brut, l’axampanada, la sidre de xelu, el llicor de sidre, l’auguardiente de sidre… ensin escaecer la sidre dulce pa quien por edá, causes físiques o decisión presonal quieran evitar l’alcol.

Momentu tamién de felicitar a los valencianos, cuyes Falles acaben de ser declaraes Patrimoniu Inmaterial de la Humanidá pola UNESCO, mentes que la Cultura Asturiana de la Sidre, qu’escomenzó la so campaña al mesmu tiempu, sigue pindia de que’l “Principado” presente la candidatura. Nun fai falta resaltar la trescendencia que tendría pa la sidre consiguir esta reconocencia, dende una perspeutiva socio-cultural por supuestu, pero especialmente nel planu económicu, pal seutor de la sidre, la hostelería y el turismu. Fáltenmos palabres pa calificar l’actuación del “Principado”, dicir na más que la falta d’un gobiernu realmente asturianu, que mire polo nueso, cuéstamos ca vegada más caro a los asturianos.

Magar tou ello la sidre avanza, y adíquense nueves actitúes. Yá nun sentimos la vieya romandela de “la sidre tocó techu” y ca vuelta ye más frecuente oyer a los llagareros falar de nuevos proyectos, tratar de lo muncho que se ta faciendo y lo muncho que ta por faer, plantegase oxetivos ca vegada más ambiciosos, tanto no qu’a la calidá se refier como a la espansión del productu en mercaos nacionales ya internacionales.

Son bonos tiempos, ensin dulda, ta trabayándose bien y recuéyense los frutos. L’añu que vien entá va ser meyor.