ENTAMU

La sidre trunfó nestes navidaes y tou apunta a qu’esti añu entrante va destacar nel mesmu sen, non solo porque vamos poder esfrutar de la impresionante collechona del añu pasáu, cuya evolución curiase nos llagares, sinón porque con práutica certidume vamos asistir a la nacencia de nuevos tipos de sidres, y van dir afitándose otres iniciatives comu la sidre de botellín, la sidre brut, la esportación, el sidreturismo….

Más difícil vamos tener avanzar en tarrenes onde lo que se precisa ye un sofitu políticu claru. Dende un “Principado” que sigue cellebrando los sos actos oficiales con vinu español, nun paez esperable que se progrese n’aspeutos fundamentales comu la incluxón nel curriculum d’hostelería de la formación comu echaor, nin la clasificación llaboral de tala actividá, l’aniciu d’estudios d’enoloxía cientraos nel mundiu la sidre, nin el necesariu sofitu al seutor sidreru, dende los collecheros fasta les sidreríes comu ellementos que conxuguen l’impulsu económicu cola capacidá identitaria, nin munchu menos la declaración de la cultura asturiana de la sidre comu padrimoniu imaterial de la humanidá, qu’anunciaron con tantu bombu, que paez aparcada en vía muerta, y de la qu’agora se desentienden.

Tenemos tamién pendiente’l futuru del Muséu de la Sidre de Nava, nuna situación incomprensible, que dempués de tantos años d’esistencia sigue ensin tener claro funciones, orientación, financiamientu, nin compromisu políticu col so futuru. Pero tamién hai aspeutos positivos, dende’l “Principado” anunciaron que van modificar la so llei d’espeutáculos públicos, que prohibe cantar nes sidreríes y establecimientos hosteleros, faciendo la esceición de los tablaos flamencos, tan abondosos nel nuesu país.

En cualisquier casu les perspeutives son bones, especialmente si sabemos conxugar les iniciatives privaes col sofitu de la sociedá asturiana, si siguimos llogrando que ca nueva meyora que se da nel seutor se viva comu una meyora pal conxuntu de los asturianos, si somos quien a integrar dientru la nuesa identidá colleutiva los progresos y la evolución de la sidre. Porque la sidre ensin Asturies y los asturianos ye menos sidre.

sidre, sidra, sidro, cider, cidre, sagardoa, Apfelwein, Píngguǒ jiǔ, cidro, siideri, seidr, leann úll, Saidā, sider, jablečné víno, jabłecznik, sydr