ENTAMU
Difícilmente superable’l mes d’ochobre tocantenes a actividá rellacionao cola sidre se refier. Escomencemos cola Fiesta de la Mazana en Villaviciosa, d’almirable evolución, siguimos con Xixón de Sidre, un ésitu en tolos sentíos, y rematamos col Salón Internacional de les Sidres de Gala -SISGA-, l’eventu sidreru más internacional de los qu’esisten n’Asturies y que per unos díes pon al nuesu país al frente del mundiu de la sidre y convierte a Xixón na so capital.
Dengún eventu comu’l SISGA foi capaz d’alzar la categoría de les sidres de copa a asemeyáu nivel, tantu no qu’a la so reivindicación y potenciación comu productu inescusable na alta gastronomía comu no que cinca a repercusión internacional, cola participación de llagareros d’una docena de países, qu’alleguen al eventu atrayíos pol so planteamientu, la so repercusión y polos ca vegada más afamaos premios SISGA, símbolu indiscutible de calidá.
Mentes esto asocede, el nuesu reinal problema de vecería enllenó les pumaraes de mazana, y esto qu’en principiu tuviera de ser motivu d’allegría, ta prevocando les avezaes tensiones cuandu’l productor intenta asitiar el so productu y atópase col inevitable amenorgamientu de preciu consecuencia de la mayor ufierta, amestao, en delles ocasiones, a lo que considera competencia deslleal de la mazana y los mostios estabilizaos que lleguen d’otros países. Nun falta razón a los productores cuando reivindiquen un mayor apueste de los llagareros pola mazana asturiana, y ye ciertu que cuando-yos interesa tamién éstos reivindiquen l’orixe autóctonu del so productu.
Sedríe interesante qu’esa reivindicación d’asturianía non solo s’aplicáre cuandu ye en beneficiu propiu, sinón por sistema, dende l’usu de la nuesa llingua, fasta’l diseñu ya impresión de les etiquetes, pasando por supuestu pola mazana. Hai que da-y puxu al texíu económico asturianu y hai que faelo ente toos, énte la apatía institucional que carecemos y cola conciencia clara de que lluchamos pol nuesu futuru.
Nesti sen los consumiores tenemos enforma que dicir, tenemos que falar de Soberanía Alimentaria, de la necesidá de xestionar, desendolcar y potenciar los nuesos productos y de distribuyir la riqueza ellí onde se xenera. Saber qué sidre bebemos non solo ye custión de gustu, ye tamién de compromisu cola nuesa tierra.
