Entamu
Consiguióse, el SISGA ’16 recuperó p’Asturies el protagonismu sidreru a nivel internacional, y fixo que Xixón asitiárase firmemente como la capital sidrera mundial que ye. La enorme potencialidá de la nuesa sidre y el nuesu país quedó de nueu patente nunes xornaes nes que la participación internacional non solo foi importante, sinón d’una impresionante calidá y de una repercusión social enorme.
La side ta viviendo ún de los momentos más felices de la so hestoria, y Asturies ta en condiciones d’aprofitar esi momentu poniéndose de cabezalera del mesmu tantu por hestoria, como por capacidá y calidá. Na midía na que sepamos tar ende y caltener una presencia y una identidá, el futuru va ser necesariamente a meyor. Nel SISGA ta escribiéndose una parte importante de la hestoria de la sidre, y tamos faciéndolo dende equí, dende Asturies y en tol universu sidreru.
Perimportante tamién la participación asturiana en Sicera 2016. La intervención como ponente de Donato X. Villoria na Conferencia de la Sidre d’Italia costitúi tou un finxu, una reconocencia internacional de primer magnitú, que tien que marcar una llínea a siguir. La sidre asturiano y la cultura asturiana de la sidra tienen de tar presentes a tolos niveles, y énte l’ausencia d’un gobiernu propiu qu’asuma les sos responsabilidaes, la iniciativa y l’esfuerzu personal y social tamién dan frutos.
Cellebrar, cómo non, l’ésitu indiscutible de Xixón de Sidre. Nuevamente quedó demostrada la capacidá de la cultura asturiana de la sidre pa superar les llimitaciones propies d’una bébora ensin más, y consiguió costituyise nun auténticu fenómenu social. Esi ye’l camín, collaboración, organización y perspeutiva socio-económica, tou un equipu ganador.
Pelo demás, son mayoría los llagares qu’empecipiaron a mayar. Espérase una collecha media, bien llueñe de la del añu pasáu, y tornamos a engrugamos cómo ye posible que nun hebia una política decidía que dea puxu al llanteru de pumares de sidre pa da-y puxu a la DOP y p’amenorgar la compra de mazana y mostios estabilizaos en toa Europa. Nun ye serio, el seutor sidreru precisa una planificación con oxetivos marcaos a mediu plazu que dea rempuesta a les necesidaes del seutor, y ye nidio qu’esa planificación nun va venir de la man del “Principado”.
