Entamu
Magar les circustancies marcaes pol andanciu, y la inseguranza que xenera la so evolución y xestión, el seutor sidreru sigui reinventándose y mirando p’alantre.
Dí ente dí podemos ver nueves iniciatives nos chigres, tantu no que cinca a seguranza como tocántenes a ufiertes, promociones, xornaes gastronómiques, degustaciones, música en direutu. Los pumareros, pela so parte, tán en plena pañada de la mazana y los llagareros escomenzando a mayar. Ná se detién.
Nesti sen, la cellebración del X Salón Internacional de les Sidres de Gala, a finales d’esti mes, costitúi tou un exemplu de voluntá y superación, que torna poner a Xixón, y Asturies como referente internacional del mundiu la sidre. El formatu va ser distintu, por supuestu, con un perimportante desendolcu online, pero caltiénse no fundamental, colos Premios SISGA qu’anuncien ser los de participación más numberosa fasta la fecha, y cola xornada d’harmonización de sidre y gastronomía que va rializase con un orixinal Brunch de Gala que va sustituyir a la tradicional Cena de Gala. El puxu d’esti eventu ye tal qu’inclusive va cuntar cola presencia de llagareros ya importadores europeos que, magar l’andanciu, van desplazase pa participar nel eventu.
Son tiempos duros nos que ye preciso saber caltener la mirada alta y actuar y planiar camentando nun futuru prósimu en que pueda recuperase la nuesa añorada normalidá.
D’otra miente, esti añu ye de poca mazana –al contrariu de lo qu’asocede nel restu’l mundiu, la vecería sigue imponiéndose n’Asturies-, pero los llagares tuvieron un mal añu, y hai muncha sidre esperando nos depósitos, colo que la necesidá va ser menor, siendo d’esperar que tola mazana asturiana se coloque ensin mayor problema. Los llagares tán escomenzando a mayar y ye tou un placer esfrutar de la sidre’l duernu, esa esquisitez que lamentablemente nun se llegó a comercializar profesionalmente, y ver como s’enllenen tinos y toneles, onde la so formientaura ye un canciu de futuru y esperanza.
