Entamu
Dende LA SIDRA quinxímos dedicar esti númberu al seutor sidreru y en xeneral a la hostelería asturiana, atalantando que non solo tán pasando bien duros momentos, y faciendo un heroicu esfuerzu p’afaese a les nueves circustancies y sobrovivir, sinón que s’atopen faltos del sofitu que se merecen per parte de los responsables de xestionar esti andanciu.
Por eso paezmos importante rescamplar que la hostelería costitúi un serviciu social esencial, que non solo permite una rellación social afayaíza, sinón que, por exemplu, presta atención y serviciu a munches presones que por estremaes sides nun puen tresnar la comida en casa. La hostelería nun ye ociu namás, como dacuandu quiérsemos tresmitir.
Per otra parte, acullá de lo que ye’l propiu establecimientu hosteleru, supon una perimportante cadena de valor, qu’abarca dende’l seutor primariu fasta’l seutor servicios: productores, provisores, tresportistes, llimpieza, etc. polo que la cantidá d’emplegos afeutaos ye enorme y l’impautu nel PIB asturianu multiplícase.
Qué dicir del seutor sidreru, cuando ye un seutor que podríemos considerar puramente asturianu y qu’amás costitúi la base de la cultura asturiana de la sidre, que foi declarada Bien d’Interés Cultural pol “Principado” y que ta en víes de que se vea reconocía pola UNESCO como Padremuñu Inmaterial de la Humanidá. Si la hostelería merez sofitu, el seutor sidreru, entá más.
La hostelería, cumple, la que tien que cumplir ye l’Alministración.
Pero nin nestos difíciles momentos el mundiu la sidre paraliza la so actividá, la DOP Sidre d’Asturies acaba de convocar elleiciones pa escoyer los vocales del so Conseyu Regulaor, y los pumareros atópense dando vida a nueves pumaraes, ensin sofitos nin suoenciones específicos del “Principado”. Nun se ve unu apueste claru pol seutor; sicasí, y como contrapuntu, el gobiernu vascu sovenciona con 50 millones d’euros a los sos llagares y la diputación de Guipúzcoa sovenciona con 295.000 euros el llantíu de pumaraes.
D’otra miente, la sidre sigue esperando nos llagares una normalidá que mos dexe esfrutala como mos presta y merecemos.
